Эрон АҚШ билан музокараларни Вашингтон ислом республикасига қарши ҳужум қилмаслик бўйича кафолат берганидан сўнг қайта бошлайди. Бу ҳақда Эрон ташқи ишлар вазири Аббос Ароқчи CBS News телеканалига берган интервьюсида маълум қилди.
“Музокаралар бу қадар тез тикланади деб ўйламайман. Агар америкаликлар музокаралар пайтида яна ҳужум қилмасликларига кафолат беришса, биз музокараларни қайта бошлаш тўғрисида қарор қабул қиламиз. Шу сабабли қарор қабул қилиш учун кўпроқ вақт талаб этилади”, деди у.
Ароқчининг таъкидлашича, Исроил билан бўлган 12 кунлик қуролли тўқнашув давомида Эрон “ўзини ҳимоя қилиш қобилиятини намоён этган” ва “тажовуз такрорланган тақдирда” буни яна амалга оширишга тайёр.
Эрон раҳбарияти АҚШ билан келишмовчиликни дипломатик йўл билан ҳал этиш мумкинми, деган саволга жавоб берар экан, Ислом республикаси ТИВ раҳбари “дипломатик ечим учун доимо имконият мавжуд бўлади”, дея таъкидлаган.
“Бомбардимонлар илмий билимлар ва уран бойитиш технологияларини йўқ қила олмайди. Агар бизда бу соҳада яна олдинга силжишга қатъият бўлса, ва бу қатъият мавжуд, биз етказилган зарарни тезда бартараф этишимиз ва йўқотилган вақтни қоплашимиз мумкин”, дея қўшимча қилди дипломат.
Унинг сўзларига кўра, Эроннинг тинчлик мақсадидаги ядро дастури миллий ғурур манбаидир.
Бундан аввал Эрон 29 июнь куни БМТ бош котибига мактуб йўллаб, Исроил ва АҚШни 12 кунлик урушда айбдор деб тан олишни талаб қилганди.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)