Netflix’нинг машҳур “Калмар ўйини” сериали муаллифи Хван Дон Хёк Time нашрига берган интервьюсида сериалдаги айрим салбий образлар Илон Маск билан ўхшашликларга эга эканини айтиб ўтди.
“Бугун Илон Маск ҳар ерда, ҳар соҳада фаол. Сериалдаги баъзи VIP шахслар чиндан ҳам унга ўхшаб кетади”, деди режиссёр.
Унинг фикрича, Илон ва сериалдаги антагонистларни ўзаро бирлаштирувчи жиҳат — бу Маскнинг нафақат глобал миқёсда таъсирга эга технологик компания раҳбари, балки жамоатчилик олдида фаол чиқишлар қиладиган сиёсий шахс сифатида ҳам танилганидир.
Сериалнинг сўнгги мавсумида илгари ниқоб ортида яширинган томошабинлар юзларини очади ва воқеалар ривожида фаол иштирок эта бошлайди. Хван Дон Хёк ушбу сюжетни замонавий технология гигантлари раҳбарлари, жумладан, Илон Маск билан боғлайди:
Бугунги кунда биз яхши биладиган олигарх шахслар, йирик технологик компаниялар эгалари очиқ майдонга чиқиб, молиявий жиҳатдан кимларни қўллаб-қувватлашини яширмай айтмоқда. Эндиликда ҳокимият ва йирик тизимларни бошқараётган одамлар парда ортида яшириниб ўтирмайди. Улар ниқобларини ечиб, худди: “Ҳамма нарсани биз бошқаряпмиз. Барча назорат бизнинг қўлимизда”, дегандек иш тутяпти, деди Хван Дон Хёк.
Жорий йил 27 июнь куни “Калмар ўйини” сериалининг якунловчи учинчи мавсуми Netflix платформасида премера қилинди. Унда бош қаҳрамон 456-ўйинчи Сон Ги Хун ҳалокатли ўйинга чек қўйиш учун синовларни давом эттиради.
Изоҳ (0)