Корея Республикаси Мудофаа вазирлиги ўтган йили Шимолий Кореяга ҳарбий дронларни ноқонуний жўнатишда гумон қилинган учувчисиз учиш аппаратлари операциялари қўмондонлиги бошлиғи генерал майор Ким Ён Дени лавозимидан четлаштирди. Бу ҳақда ҳарбий идора хабар берди.
Маълум қилинишича, ушбу қадам собиқ президент Юн Сок Ёлнинг икки корейс давлати ўртасида кескинликни келтириб чиқариш ва Жанубий Кореяда ҳарбий ҳолат жорий этиш режасининг бир қисми бўлган.
Ким Ён Дени собиқ президент Юн Сок Ёл ишини тергов қилаётган махсус прокурор генерал майорни қамоққа олиш учун ордер сўраганидан бир кун ўтгач ишдан четлаштирилди. Шу билан бирга, Сеул марказий округ суди қамоққа олиш ордерини бериш тўғрисидаги илтимосномани рад этиб, бу гумонланувчининг ҳимояланиш ҳуқуқини ҳаддан ташқари чеклашини таъкидлаган.
Таъкидланишича, Юн Сок Ёл 2024 йил октябрь ойида Шимолий Кореянинг ҳарбий жавобини чақириш ва шу орқали ҳарбий ҳолат жорий этилишини оқлаш мақсадида учувчисиз учиш аппаратлари қўмондонлигига тўғридан-тўғри буйруқ берган. Мудофаа вазирлиги ва Штаб бошлиқлари қўмитаси бу ҳақда гўё хабардор қилинмаган.
Ким Ён Де бу ҳодисага алоқадорлигини қатъиян инкор этиб, дронларни жўнатиш Шимолий Кореянинг Жанубий Кореяга ҳаво шарларини учириш кампаниясига қарши кураш доирасида Штаб бошлиқлари қўмитаси буйруғи билан қонуний равишда амалга оширилганини таъкидламоқда.
Изоҳ (0)