АҚШдаги судлар Дональд Трампнинг янги президентлик муддати бошланганидан буён 75 фоиз ҳолатда унинг рақибларининг даъволарини қўллаб-қувватлаган. Бу ҳақда Тhе Washington Times газетаси хабар бермоқда.
“Трамп АҚШ Конгрессини бўйсундиришга эришди, ўзининг кучли дастурини амалга оширишда бюрократияни сезиларли даражада жиловлади, бироқ федерал судьялар унга ён бермасликка қарор қилишди”, дейилади мақолада.
Маълум қилинишича, Трамп бошчилигидаги маъмурият ҳокимият тепасида турган олти ой давомида президентнинг хатти-ҳаракатларига қарши камида 500 та ёки кунига деярли тўртта даъвога дуч келган.
Нашр маълумотларига кўра, ҳолатларнинг тўртдан уч қисмида судьялар Америка раҳбарининг нуқтаи назарига қарши қарорлар чиқарган.
“Уларнинг катта қисми чет эллик талабаларнинг иммиграция ва жиноий ўтмишига тааллуқли ҳужжатлардаги қоидабузарликлар билан боғлиқ ишларни кўриб чиқишга оид эди”, дейилади мақолада.
Таъкидланишича, судлар сўнгги олти ой ичида “мисли кўрилмаган миқдордаги ишларни”, жумладан, “беқиёс иммиграция жанжалларини ва федерал хизматчиларни ишдан бўшатиш ёки давлат муассасаларини қайта ташкил этишда президент ваколатлари чегаралари бўйича янгича масалаларни” кўриб чиққан.
“Бу, шубҳасиз, Трамп ҳаракатларининг тасаввурга сиғмайдиган кўлами ва суръатининг аксидир ва унинг дадил дастури судьяларни чалғитадиган янги юридик далиллар билан мустаҳкамланган”, дейилади нашрда.
Виржиния штатининг собиқ бош прокурори Кен Куччинеллининг сўзларига кўра, судьяларга “Дональд Трампнинг ноанъанавий ёндашуви мутлақо ёқмайди”.
Қайд этилишича, фақат Трамп томонидан тайинланган судьяларгина унинг фойдасига ҳукм чиқаришган.
Изоҳ (0)