21 июль куни Ўзбекистонда рақамли саводхонликни ошириш, IT таълимни ривожлантириш ва келажак касбларига тайёргарликни кучайтириш мақсадида "IT ва рақамли таълимни ривожлантириш форуми" ташкил этилди. Форум доирасида соҳадаги энг долзарб масалалар муҳокама қилиниб, янги тадқиқот натижалари эълон қилинди.
Форум “Ўзбекистонда IT ва рақамли таълим ландшафтини яхшилаш: Тадқиқот босқичи” лойиҳасининг натижаларига бағишланган бўлиб, Ўзбекистоннинг рақамли таълим ва IT соҳасидаги ишчи кучини ривожлантиришга қаратилган кенг қамровли ташаббуснинг бир қисмидир.
Ушбу босқичда кенг қамровли тадқиқот ишлари олиб борилиши назарда тутилган бўлиб, кейинги босқичлар учун мустаҳкам замин яратишга хизмат қилади. Кейинги босқичларда махсус таълим дастурлари, ўқитувчилар учун салоҳиятни ошириш дастурлари ва талабалар учун касбий кўмак механизмлари йўлга қўйилади.
Аҳолининг IT саводхонлигида мавжуд бўшлиқларни аниқлаш ва таълим ресурсларини меҳнат бозорининг эҳтиёжларига мослаштириш орқали ушбу кўп босқичли ташаббус малакали ва инклюзив рақамли ишчи кучини шакллантиришга хизмат қилади.
IT таълим уюшмаси ННТ ва Швейцария тараққиёт ва ҳамкорлик агентлиги ҳамкорлигида амалга оширилган мазкур лойиҳа Ўзбекистонда рақамли иқтисодиёт сари босқичма-босқич ҳаракат қилиш жараёнида аҳолининг рақамли саводхонлигини ошириш ва IT соҳасида сифатли таълимни йўлга қўйишга қаратилган.
Лойиҳа 2024 йилнинг сентябрь ойида бошланган бўлиб, аҳолининг IT саводхонлиги ва малакасидаги бўшлиқларни таҳлил қилиш: Турли демографик гуруҳлар орасида IT саводхонлик даражасини ўрганиш, ҳудуд, жинс, ёш ва ижтимоий-иқтисодий ҳолат бўйича тафовутларни аниқлашга қаратилган.
Лойиҳанинг асосий мақсадлари Ўзбекистонда IT ва рақамли саводхонликни ошириш ҳамда ижтимоий ҳимояга муҳтож гуруҳлар – жумладан, ёшлар, қишлоқ аҳолиси, аёллар, ногиронлар ва кам таъминланган оилалар вакилларининг IT кўникмалари даражасини аниқлаш. Биринчи босқич қуйидагиларга қаратилган:
- Аҳоли орасида IT саводхонлигининг ҳозирги даражасини баҳолаш.
- IT сектори иш берувчиларининг эҳтиёжларини аниқлаш.
- Кейинги 10 йил давомида IT ва рақамли соҳада истиқболли касбларни белгилаш, бу орқали таълим режалаштириш ва кадрлар тайёрлаш йўналишларини шакллантириш.
Лойиҳанинг тадқиқот босқичи доирасида 2025 йил март–июнь ойлари мобайнида ташкил этилган онлайн ва офлайн шаклда ўтказилган сўровномада мамлакатнинг турли ҳудудларидан 4 мингдан ортиқ фуқаро иштирок этди.
Форумда лойиҳадан олинган натижалар сарҳисоб қилинди ва оммага тақдим этилди, жумладан:
- 2025 йил февраль–май ойлари мобайнида “Ўзбекистонда рақамли саводхонлик даражасини аниқлаш” бўйича онлайн ва офлайн шаклда ташкил этилган сўровнома натижалари:
Тадқиқотнинг энг эътиборга молик томони — иштирокчилар орасида эркаклар ва аёллар сони деярли тенг (50,7%-аёллар, 49.3%-эркаклар) бўлган. Буни шунчаки рақам эмас — буни Ўзбекистонда IT соҳасига қизиқувчилар орасидаги гендер тенглик сифатида баҳолаш мумкин.
Сўровномада иштирок этганлар ўз IT кўникмаларини қуйидагича баҳолаган:
17% — аъло
44% — яхши
32% — қониқарли
Масофавий иш ёки ўқиш учун видеоалоқа воситаларидан фойдаланиш кўрсатгичи ҳақида сўралганда, қарийб 57 фоиз сўровнома иштирокчилари деярли ҳар ҳафта видеоалоқа воситаларидан фойдаланишларини билдирган.
Бундан ташқари 78 фоиз иштирокчилар ҳар ой Электрон ҳукумат тизимларидан фойдаланиши аниқланган.
Қуйидаги рақамларга эътибор беринг:
- 96% иштирокчи IT соҳасига ўз қизиқишини билдирган
- 97% эса рақамли кўникмалар иш сифатига бевосита ижобий таъсир кўрсатишини таъкидлаган.
52.4 фоиз аҳоли ойига 2-3 марта Маркетплейс ва ижтимоий тармоқ орқали онлайн харид амалга оширишини билдирган, 25 фоиз аҳоли йилига 2-3 марта ва 22 фоиз аҳоли ҳеч қачон онлайн харид амалга оширмаслигини билдирган.
Форумда мутахассислар томонидан ишлаб чиқилган ва меҳнат бозори таҳлилига асосланган ТОП-45 IT касбдан иборат “Келажак касблари атласи” тақдим этилди. Ушбу атлас ёшларга, ота-оналарга, таълим ташкилотларига ва кадрлар сиёсатида иштирок этувчи ташкилотларга амалий йўналиш беришга қаратилган.
Шунингдек Форум доирасида Тадқиқот натижаларини марказлаштириш, бепул IT таълим ресурсларини жойлаштириш ва касбий йўналтиришни таъминлайдиган DigiSurvey.uz онлайн платформаси тақдимоти ҳам бўлиб ўтди.
Тадбир давомида IT Park, Рақамли таълимни ривожлантириш Маркази, АлмаУ ва бошқа ташкилотлардан мутахассислар иштирокида панел муҳокамалар, таълимдаги инновация ва стартаплар ҳақида сессиялар, нетворкинг, маҳорат дарслари ва интерактив ўйинлар ҳам ташкил этилди.
Лойиҳанинг ҳамкор ташкилотлари сифатида Ўзбекистон Республикаси Рақамли технологиялар вазирлиги, IT Park Ўзбекистон, Рақамли таълимни ривожлантириш маркази, Ўзбекистон ногиронлар ассоциацияси, IT Ladies ҳамжамияти ҳамда Ёшлар ишлари агентлиги иштирок этди.
Реклама ҳуқуқи асосида
Изоҳ (0)