25 давлат ташқи ишлар вазирлари ва Европа Иттифоқининг тенглик, тайёргарлик ва инқирозларни бошқариш бўйича комиссари Ажа Лябиб Исроилни Ғазо секторидаги урушни тўхтатишга ва у ерга гуманитар ёрдам етказилишига йўл очишга даъват этди. Бу ҳақда Буюк Британия Ташқи ишлар вазирлиги тарқатган қўшма баёнотда ма`лум қилинди.
“Биз, қуйида имзо чекувчилар, оддий ва кечиктириб бўлмайдиган чақириқ билан бирлашамиз: Ғазодаги уруш дарҳол тўхтатилиши лозим”, дея таъкидланади қўшма баёнотда.
“Исроил ҳукумати қўллаётган инсонпарварлик ёрдамини етказиб бериш усули хавфли, беқарорликни кучайтиради ва Ғазо аҳолисини инсоний қадр-қимматдан маҳрум этади. Биз Исроил ҳукуматини гуманитар ёрдам етказишга қўйилган чекловларни зудлик билан бекор қилишга ҳамда БМТ ва гуманитар ноҳукумат ташкилотларига ўз қутқарув ишларини хавфсиз ва самарали тарзда амалга ошириш имкониятини тезда таъминлашга чақирамиз”, дейилади баёнотда.
Мурожаат муаллифлари Иордан дарёсининг Ғарбий қирғоғидаги Исроил фуқаро маъмуриятининг Қуддус ва Ғарбий қирғоқдаги йирик Маале-Адумим аҳоли пункти ўртасидаги E1 (East 1) номли ҳудудда янги аҳоли пункти барпо этиш режаларини қоралаган.
“Агар бу режа амалга оширилса, у Фаластин давлатини икки қисмга бўлиб ташлайди. Бу эса халқаро ҳуқуқнинг очиқ бузилиши бўлиб, икки давлат асосидаги ечим истиқболларига жиддий путур етказади”, дейилади ҳужжатда.
Шунингдек, мурожаат матнида томонлар ҳам, халқаро ҳамжамият ҳам “бу даҳшатли можарони дарҳол, сўзсиз ва доимий равишда ўт очишни тўхтатишга эришиш орқали якунлаш учун биргаликдаги саъй-ҳаракатларда бирлашиш”га чақирилган, ҳамда АҚШ, Қатар ва Мисрнинг бу йўналишдаги саъй-ҳаракатлари қўллаб-қувватланган.
Ҳужжатни Австралия, Австрия, Бельгия, Буюк Британия, Дания, Испания, Исландия, Ирландия, Италия, Канада, Латвия, Литва, Люксембург, Нидерландия, Янги Зеландия, Норвегия, Польша, Португалия, Словения, Финляндия, Франция, Швейцария, Швеция, Эстония ва Япония ташқи ишлар вазирлари, шунингдек, юқорида тилга олинган Европа Иттифоқи комиссари имзолаган.
Изоҳ (0)