Украина Миллий хавфсизлик ва мудофаа кенгаши (МХМК) котиби Россия томонига келгуси ҳафта музокараларнинг янги босқичини ўтказишни таклиф этди. Бу ҳақда Украина президенти Владимир Зеленский ўзининг кечки мурожаатида маълум қилди.
“Шунингдек, МХМК котиби Умеров Россия томонига келаси ҳафта навбатдаги учрашувни таклиф қилганини хабар берди. Музокаралар суръатини тезлаштириш лозим. Ўт очишни тўхтатишга эришиш учун барча чораларни кўриш керак”, деди Зеленский.
Украина президентининг таъкидлашича, томонлар Истанбулда ўтказилган музокаралар якунида эришилган келишувларни бажаришда давом этмоқда. Унинг айтишича, яна бир алмашинув тайёрланмоқда.
“Ҳақиқий ва узоқ муддатли тинчликни таъминлаш учун раҳбарлар даражасидаги учрашув зарур. Украина бундай учрашувга тайёр”, деди Украина президенти.
Россия ва Украина музокаралардаги уч йиллик танаффусдан сўнг Истанбулда икки марта учрашди — делегациялар 16 май ва 2 июнь кунлари юзма-юз келди. Сўнгги музокараларда Россия ва Украина томонлари ўт очишни тўхтатиш бўйича ўз таклифларини ўз ичига олган меморандумлар лойиҳаларини тақдим этди ва ҳалок бўлганларнинг жасадларини қайтариш бўйича келишувга эришди. Ўшанда делегациялар оғир ярадор ҳарбийлар ва 25 ёшгача бўлган асирларни алмашиш тўғрисида ҳам келишиб олишганди.
Изоҳ (0)