АҚШ президенти Дональд Трамп 4 июль куни Украина президенти Владимир Зеленский билан ўтказган телефон орқали суҳбатда уни Россия ҳудудининг ички қисмларига зарба беришга ундади. Бу ҳақда Financial Times хабар бермоқда.
Агентлик манбасига кўра, Оқ уй раҳбари украиналик ҳамкасбидан узоқ масофали қуроллар етказиб берилган тақдирда, Украина Россиянинг ичкарисидаги ҳарбий нишонларга зарба бериш имкониятига эга бўладими, деб сўраган.
“Владимир, Москвага зарба бера оласизми? Санкт-Петербургга зарба бера оласизми?”, дея сўраган Трамп.
Манбага кўра, Зеленский “Албатта. Агар бизга қурол берсангиз, зарба бера оламиз”, деган жавобни берган.
Таъкидланишича, Трамп бундай стратегияни қўллаб-қувватлашини билдирган ва буни Россия шаҳарларига зарбалар Кремлни музокаралар столига ўтиришга мажбур қилиши кераклиги билан изоҳлаган.
Қўнғироқ мазмунидан хабардор бўлган Ғарб расмийларидан бирининг айтишича, ушбу суҳбат Украинанинг Ғарбдаги ҳамкорларининг узоқ масофали қуролларни етказиб беришни муҳокама қилишга тайёрлиги ортиб бораётганини акс эттиради.
Оқ уй ва Украина президенти офиси ҳозирча изоҳ сўровларига жавоб бермаган.
Ўтган ҳафта Римда бўлиб ўтган Украинани тиклаш бўйича халқаро конференция доирасида АҚШ томони Зеленский билан Украинага берилиши мумкин бўлган узоқ масофали зарба тизимлари рўйхатини баҳам кўргани айтилмоқда.
Украиналиклар тахминан 1600 км масофага учадиган юқори аниқликдаги Tomahawk ракеталарини сўраган.
“Аммо Трамп маъмурияти, Байден маъмурияти сингари, Украинанинг тийиқсизлигидан хавотирда эди”, деди манба.
Душанба куни НАТО бош котиби Марк Рутте билан Овал кабинетдаги учрашувда Трамп Украинага Патриот зенит-ракета тизимлари ва тутқич ракеталарини етказиб бериш режасини эълон қилди. Бироқ бошқа қурол тизимлари етказиб берилиши ҳақида маълумот бермаган.
Изоҳ (0)