Ўзбекистон фуқароси Россияда қамоқ жазосини ўтаб юрган вақтида “Вагнер” хусусий ҳарбий компанияси орқали Украинага қарши ҳарбий ҳаракатларда қатнашгани аниқланди.
“Дарё” мухбири танишган суд ҳужжатига кўра, у 2020 йилда Москва шаҳрига мавсумий ишлаш мақсадида борган ва ўша ерда қасддан одам ўлдириш жинояти учун 2021 йилда 9 йилга озодликдан маҳрум этилган.
2022 йил 21 сентябрда қамоқхонадан жанговар ҳаракатларда қатнашиш шарти билан чиқарилиб, Россия Мудофаа вазирлиги билан шартнома тузган ва 2023 йил 21 мартга қадар Россия—Украина урушида қатнашган.
Ҳарбий хизматни якунлагач, у содир этган жинояти учун Россия президенти фармони билан афв этилган ва медал билан тақдирланган. Р.Д. 2025 йил 9 март куни Москва—Самарқанд рейси орқали Ўзбекистонга қайтиб келган. 11 март куни эса ўз хоҳишига кўра ДХХ Қашқадарё бошқармасига мурожаат қилиб, Россия—Украина урушида қатнашганини тан олган ва тегишли ҳужжатларни тақдим қилган.
Аниқланишича, у ҳарбий хизмат учун ваколатли бўлмаган бўлса ҳам, ўз манфаатини кўзлаб, бошқа давлат ҳудудида қуролли тўқнашувларда қатнашган.
Унга нисбатан 3 йил 6 ой озодликни чеклаш жазоси тайинланди.
Украинага қарши урушда Россия армияси сафида жанг қилган 66 нафар Ўзбекистон фуқароси ҳалок бўлган. Маълумотларга кўра, Россия армияси сафида жанг қилган хорижликлар 28 та давлатдан бўлган. Қурбонлар сони бўйича биринчи ўринда, катта эҳтимол билан, Шимолий Корея фуқаролари туради. Жанубий Корея разведкаси маълумотига кўра, урушда ҳалок бўлган шимолий кореяликлар сони 600 нафарга етиши мумкин. Бироқ бу борада расмий маълумотлар мавжуд эмас.
Хорижлик қурбонлар ичида Тожикистон фуқаролари (72 киши) етакчилик қилмоқда. Иккинчи ўринда Ўзбекистон (66 нафар) фуқаролари туради. Тожикистондан 43 киши ва Ўзбекистондан 46 киши қамоқ жазосини “ноллаштиришга” уринган. Уларнинг аксарияти “Вагнер” хусусий ҳарбий кампанияси билан шартнома имзолаган.
Изоҳ (0)