Украина Олий Радаси мамлакатнинг собиқ иқтисодиёт вазири Юлия Свириденкони Украина бош вазири лавозимига тасдиқлади. Бу ҳақда депутатлар Ярослав Железняк ва Алексей Гончаренкога таяниб DW нашри хабар берди.
Свириденко номзодини 262 депутат қўллаб-қувватлади, 22 нафар парламент аъзоси қарши чиқди, 26 нафари бетараф бўлган, яна 22 депутат бу масалада овоз бермасликни маъқул кўрган.
2020 йил март ойидан буён Украина ҳукуматини Денис Шмигал бошқариб келаётганди. Аввалроқ унинг истеъфоси ва ҳукуматнинг тарқатилиши Олий Рада томонидан бир овоздан маъқулланди. Украина президенти Владимир Зеленский 16 июлда Шмигални мудофаа вазири этиб тайинлаш ҳақидаги ҳужжатларни имзолаганини ва Олий Радага юборганини маълум қилди.
Зеленский янги ҳукумат шаклланиши муносабати билан Радада сўзга чиқиб, АҚШ билан бўлажак келишувлар ҳақида баёнот қилди. Унга кўра, бу келишувлар “мамлакатни мустаҳкамлайди”. Президент Зеленский янги ҳукуматга мамлакатда ишлаб чиқариладиган қурол ва ҳарбий техниканинг 50 фоизини таъминлаш мақсадида амалдаги мудофаа харидлари бўйича шартномаларни аудитдан ўтказишни топширди.
Свириденко ким?
Юлия Свириденкога 39 ёшда. У Черниговда туғилиб ўсган, кейинчалик Киев Миллий савдо-иқтисодиёт университетини тамомлаган. 2019 йилдан бошлаб Свириденко Иқтисодиёт вазирлиги раҳбариятида фаолият юритган.
2020 йил декабрь ойида у президент девони раҳбари Андрей Ермакнинг ўринбосари бўлди. 2021 йил ноябрь ойида эса у иқтисодиёт вазири ва Украина биринчи вице-премери лавозимига тайинланди. Свириденко АҚШ билан ресурсларга доир битим юзасидан музокаралар олиб борган ва бу келишувни апрель ойида Украина номидан имзолаган.
Изоҳ (0)