Исроил озиқ-овқат етказиб беришни тўхтатганидан сўнг Ғазода 4 ёшли Разан Абу Заҳер вафот этди. Бу ҳақда CNN хабар берди.
Қизалоқ очлик ва етарли овқатланмаслик оқибатида Ғазо марказидаги шифохонада жон берган. Ғазода уруш бошланганидан бери камида 76 нафар бола ва 10 нафар катта ёшли инсон очликдан ўлган. Уларнинг аксарияти март ойида Исроил блокада эълон қилганидан кейин вафот этган.
Разан сўнгги уч кун ичида очликдан ўлган камида тўртта боладан биридир. Қурбонлар орасидаги энг кичиги атиги уч ойлик бўлган. Сўнгги 24 соатда очарчилик сабаб 18 киши ҳалок бўлган, дейди Ғазо Соғлиқни сақлаш вазирлиги.
CNN нашри бир ой олдин Разан билан учрашган. Ўшанда қизча жуда озиб кетган ва ҳолсиз бўлган. Онаси Таҳрир Абу Даҳер “сут сотиб олишга пулим йўқ”, дея шикоят қилган.
Урушдан олдин соғлиғи яхши эди, лекин уруш бошланганидан сўнг тўйиб овқат емагани сабаб аҳволи ёмонлашди. Унга қувват берадиган ҳеч нарса йўқ, деган она.
Бу суҳбат 23 июнь куни бўлиб ўтганди. Ўшанда Разан 12 кундан бери касалхонада ётган. У яна 27 кун ҳаёт учун курашган. Исроил ёрдам етказишни тўхтатганини уни ҲАМАС ўғирлаётгани билан изоҳлаган. ҲАМАС эса бу айбловларни рад этган.
Исроилнинг Ғазога гуманитар ёрдам оқимини назорат қилувчи CОGAT агентлигига кўра, уруш бошланганидан буён Ғазога тахминан 67 мингта озиқ-овқат юк машинаси кириб, 1,5 миллион тоннага яқин маҳсулот етказилган.
Изоҳ (0)