Ukraina Milliy xavfsizlik va mudofaa kengashi (MXMK) kotibi Rossiya tomoniga kelgusi hafta muzokaralarning yangi bosqichini o‘tkazishni taklif etdi. Bu haqda Ukraina prezidenti Vladimir Zelenskiy o‘zining kechki murojaatida ma’lum qildi.
“Shuningdek, MXMK kotibi Umerov Rossiya tomoniga kelasi hafta navbatdagi uchrashuvni taklif qilganini xabar berdi. Muzokaralar sur’atini tezlashtirish lozim. O‘t ochishni to‘xtatishga erishish uchun barcha choralarni ko‘rish kerak”, dedi Zelenskiy.
Ukraina prezidentining ta’kidlashicha, tomonlar Istanbulda o‘tkazilgan muzokaralar yakunida erishilgan kelishuvlarni bajarishda davom etmoqda. Uning aytishicha, yana bir almashinuv tayyorlanmoqda.
“Haqiqiy va uzoq muddatli tinchlikni ta’minlash uchun rahbarlar darajasidagi uchrashuv zarur. Ukraina bunday uchrashuvga tayyor”, dedi Ukraina prezidenti.
Rossiya va Ukraina muzokaralardagi uch yillik tanaffusdan so‘ng Istanbulda ikki marta uchrashdi — delegatsiyalar 16-may va 2-iyun kunlari yuzma-yuz keldi. So‘nggi muzokaralarda Rossiya va Ukraina tomonlari o‘t ochishni to‘xtatish bo‘yicha o‘z takliflarini o‘z ichiga olgan memorandumlar loyihalarini taqdim etdi va halok bo‘lganlarning jasadlarini qaytarish bo‘yicha kelishuvga erishdi. O‘shanda delegatsiyalar og‘ir yarador harbiylar va 25 yoshgacha bo‘lgan asirlarni almashish to‘g‘risida ham kelishib olishgandi.
Izoh (0)