Paramount компанияси АҚШ президенти Дональд Трампнинг собиқ вице-президент Камала Ҳаррис билан интервьюси сабабли ўзига қарашли CBS телеканалига нисбатан киритган даъвосини ҳал қилишга рози бўлди ва Оқ уй раҳбарига 16 миллион доллар тўлашга тайёрлигини билдирди. Бу ҳақда New York Times газетаси компания баёнотига асосланиб хабар бермоқда.
“Paramount CBS телеканалининг 60 Minutes дастуридаги Камала Ҳаррис интервьюси таҳрирлангани сабабли Трампнинг даъвосини ҳал этиш учун президентга 16 миллион доллар тўлашга рози бўлди”, дея ёзмоқда нашр.
Баъзи америкалик ҳуқуқшунослар Трампнинг даъвосини асоссиз деб ҳисобламоқда. Уларнинг фикрича, CBS охир-оқибат судда ғалаба қозонган бўларди, чунки у ҳақиқатда нотўғри маълумот бермаган, қолаверса, қонун нашриётларга маълумотни қандай тақдим этишни белгилашда кенг эркинлик беради.
Бироқ нашр маълумотларига кўра, Paramount’нинг раиси ва назорат қилувчи акциядори Шари Редстоун директорлар кенгашига Трамп билан келишувни қўллаб-қувватлашини айтган. Компаниянинг айрим раҳбарлари президентнинг даъвосини Голливуднинг Skydance студиясига кўп миллиардлик сотувни якунлашга тўсиқ бўлиши мумкин деб ҳисоблашган. Чунки бу келишув Трамп маъмурияти томонидан тасдиқланиши керак эди.
2024 йил октябрида ўшанда Республикачилар партиясидан АҚШ президентлигига номзод бўлган Трамп CBS телеканалига қарши 10 миллиард долларлик даъво киритган эди. У телеканални Ҳаррис билан интервьюни нохолис монтаж қилишда айблади ва буни 5 ноябрдаги сайловлар олдидан Демократик партияни қўллаб-қувватлашга қаратилган ҳаракат деб ҳисоблади. Кейинчалик Трамп даъво суммасини 20 миллиард долларгача оширди.
Даъво аризасида айтилишича, CBS интервьюнинг икки хил версиясини кўрсатган, унда Ҳаррис Исроил ва ҲАМАС можароси ҳақидаги бир хил саволга турлича жавоб берган. Телеканал даъвони асоссиз деб атаб, уни рад этишга уринган. Апрель ойида томонлар медиация жараёнига ўтишган.
Май ойида CBS News телеканали президенти ва бош директори Венди Макмахон ушбу даъво фонида ўз лавозимини тарк этишини эълон қилди ва буни компания раҳбарияти билан келгусидаги ривожланиш бўйича қарашлари фарқ қилиши билан изоҳлади.
Изоҳ (0)