Paramount kompaniyasi AQSH prezidenti Donald Trampning sobiq vitse-prezident Kamala Harris bilan intervyusi sababli o‘ziga qarashli CBS telekanaliga nisbatan kiritgan da’vosini hal qilishga rozi bo‘ldi va Oq uy rahbariga 16 million dollar to‘lashga tayyorligini bildirdi. Bu haqda New York Times gazetasi kompaniya bayonotiga asoslanib xabar bermoqda.
“Paramount CBS telekanalining 60 Minutes dasturidagi Kamala Harris intervyusi tahrirlangani sababli Trampning da’vosini hal etish uchun prezidentga 16 million dollar to‘lashga rozi bo‘ldi”, deya yozmoqda nashr.
Ba’zi amerikalik huquqshunoslar Trampning da’vosini asossiz deb hisoblamoqda. Ularning fikricha, CBS oxir-oqibat sudda g‘alaba qozongan bo‘lardi, chunki u haqiqatda noto‘g‘ri ma’lumot bermagan, qolaversa, qonun nashriyotlarga ma’lumotni qanday taqdim etishni belgilashda keng erkinlik beradi.
Biroq nashr ma’lumotlariga ko‘ra, Paramount’ning raisi va nazorat qiluvchi aksiyadori Shari Redstoun direktorlar kengashiga Tramp bilan kelishuvni qo‘llab-quvvatlashini aytgan. Kompaniyaning ayrim rahbarlari prezidentning da’vosini Gollivudning Skydance studiyasiga ko‘p milliardlik sotuvni yakunlashga to‘siq bo‘lishi mumkin deb hisoblashgan. Chunki bu kelishuv Tramp ma’muriyati tomonidan tasdiqlanishi kerak edi.
2024-yil oktyabrida o‘shanda Respublikachilar partiyasidan AQSH prezidentligiga nomzod bo‘lgan Tramp CBS telekanaliga qarshi 10 milliard dollarlik da’vo kiritgan edi. U telekanalni Harris bilan intervyuni noxolis montaj qilishda aybladi va buni 5-noyabrdagi saylovlar oldidan Demokratik partiyani qo‘llab-quvvatlashga qaratilgan harakat deb hisobladi. Keyinchalik Tramp da’vo summasini 20 milliard dollargacha oshirdi.
Da’vo arizasida aytilishicha, CBS intervyuning ikki xil versiyasini ko‘rsatgan, unda Harris Isroil va HAMAS mojarosi haqidagi bir xil savolga turlicha javob bergan. Telekanal da’voni asossiz deb atab, uni rad etishga uringan. Aprel oyida tomonlar mediatsiya jarayoniga o‘tishgan.
May oyida CBS News telekanali prezidenti va bosh direktori Vendi Makmaxon ushbu da’vo fonida o‘z lavozimini tark etishini e’lon qildi va buni kompaniya rahbariyati bilan kelgusidagi rivojlanish bo‘yicha qarashlari farq qilishi bilan izohladi.
Izoh (0)