АҚШда 2020 йили қотилликлар сони 2019 йилга нисбатан 30 фоизга кўпайган. Шу билан бирга, ўқотар қурол билан ҳужум қилиш ва жиддий зўравонликлар сони мос равишда 8 ва 6 фоизга ошган. Бу ҳақда «Коммерсантъ» хабар қилди.
Бундай маълумотлар COVID-19 ва жиноий суд ишлари бўйича миллий комиссия томонидан «Пандемия, тартибсизлик, Америка шаҳарларидаги жиноятчилик ва зўравонлик» ҳисоботида келтирилган.
«2020 йилнинг ҳар ойидаги қотилликлар сони 2019 йилдагидан ошиб кетди», – дейилади ҳисоботда.
Американинг 34 шаҳридаги вазият таҳлили шуни кўрсатдики, 2020 йили қотилликлар 2019 йилга нисбатан 1268 тага кўпроқ бўлган. Ўсишнинг катта қисми Нью-Йорк, Лос-Анжелес ва Чикагода кузатилган. Масалан, 2020 йили Чикагода 748 киши ўлдирилган, бу 2019 йилга нисбатан 56 фоизга кўпдир.
Таъкидланишича, барибир бу кўрсаткич тарихий рекордни янгилай олмаган. 2020 йилда ушбу 34 та шаҳар 100 000 кишига 11,4 қотиллик тўғри келган бўлса, 1995 йилда 100 000 кишига 19,4 та қотиллик тўғри келган.
Шу билан бирга, ҳисобот муаллифлари айрим турдаги жиноятлар аксинча, камайганлигини таъкидламоқдалар. Масалан, гиёҳванд моддалар билан боғлиқ жиноятлар, ўғирликлар, нотурар жойларни тунаш, мулкни ўмариш ҳолатлари нисбатан кам кузатилган. Мутахассисларнинг фикрича, пандемияда аҳоли уйда ўтиришга кўпроқ мойил бўлгани ва бир-бири билан камроқ мулоқот қилгани бунга сабаб бўлган.
Аввалроқ АҚШ федерал ҳукумати 68 йил ичида биринчи марта аёл кишини қатл этгани ҳамда АҚШда афроамерикалик Жорф Флойдни ўлдириб қўйган полициячи 1 млн доллар гаров пули эвазига қамоқдан чиққани ҳақида хабар берилганди.
Изоҳ (0)