Таиландлик аёл тасодифан чиқиндихонада 12 миллион бат (салкам 368 минг АҚШ доллардан ортиқ) солинган пластик идишни топиб олди. Бу ҳақда маҳаллий Тhе Thaiger нашри хабар бермоқда.
Воқеа 5 июнь куни кечқурун Таиланднинг Нонтхабури вилоятидаги Паккрет туманида содир бўлган. Уса исмли аёл полицияга мурожаат қилиб, ўзи яшайдиган турар жой мажмуасининг тўртинчи қаватидаги чиқиндихонадан пул топганини маълум қилган.
Аёлнинг айтишича, у кечқурун уйига қайтганда, ўз қаватида деярли янги, ташлаб кетилган пластик идишни кўриб, уни ўзига олишга қарор қилган. Идиш ичида минг батлик банкнотлар тўплами борлигини кўргач, аёл дарҳол полицияни чақирган.
Воқеа жойига етиб келган полиция ходимлари топилмани текшириб, контейнерда пулдан ташқари, Миллий телерадиоэшиттириш ва телекоммуникациялар комиссияси бошқармасига тегишли расмий ҳужжатни ҳам топишган. Барча ҳужжатларда Тавиват деган исм қайд этилгани маълум бўлган.
Шунингдек, ҳуқуқ-тартибот идоралари ходимлари ушбу маблағ 2020 йилда ечиб олинган банк номини ҳам аниқлашган.
Кейинчалик маблағ эгаси топилган. У ўша турар жой мажмуасининг фуқароси бўлган. Унинг айтишича, у квартирасини таъмирлашга тайёргарлик кўраётганида пластик қутини ичида фақат эски кийимлар бор деб ўйлаб, чиқинди қутисига ташлаб юборган.
Эркак бир нечта компанияларда юрист ва маслаҳатчи бўлиб ишлаб, ҳалол йўл билан пул топганини таъкидлаган. У 2020 йилдаёқ банкдан маблағларни ечиб олганини айтган. Ҳозирда полиция унинг сўзларини текширмоқда.
Изоҳ (0)