Калифорния губернатори Гевин Ньюсом АҚШ президенти Дональд Трампни норозилик намойишларини бостириш учун Лос-Анжелесга Миллий гвардия юборгани сабабли судга бермоқчи. Бу ҳақда у ўзининг Х ижтимоий тармоғидаги саҳифасида маълум қилди.
“Дональд Трамп айнан шуни хоҳлаган эди. У олов ёқиб, сўнгра ноқонуний равишда Миллий гвардияни федераллаштирмоқчи бўлди. У имзолаган фармон фақат Калифорнияга эмас, балки ҳар қандай штатга аралашиш ва шундай қилиш имкониятини беради. Биз уни судга берамиз”, дея ёзди Гевин Ньюсом.
Шунингдек, губернатор АҚШ иммиграция ва божхона полицияси ходимлари ўз ҳаракатларини у билан келишмаётганини ҳам айтган.
Ньюсомнинг MSNBC эфирида тушунтиришича, суд даъвоси у билан келишилмаган ҳолда Миллий гвардия қўшинларини киритиш билан боғлиқ бўлади, чунки Трампнинг фармонида бу шарт кўрсатилган. Калифорния губернатори АҚШ президентини тартибсизликлар вазиятини оғирлаштирганликда айблади.
“У Миллий гвардияга раҳбарлик қилишини эълон қилганидан бери вазиятни янада кескинлаштирмоқда - бу ноқонуний ҳаракат, Конституцияга зид ахлоқсизликдир”, дея таъкидлади Ньюсом.
Лос-Анжелесдаги норозилик намойишлари уч кундан бери давом этмоқда. Улар маҳаллий аҳолининг ноқонуний муҳожирларга қарши рейд ўтказган федерал агентлар билан тўқнашувларидан бошланди, натижада ўша куни камида 44 киши ҳибсга олинди. Аҳоли кўчаларни қисман тўсиб қўйди, полиция билан тўқнашувлар юз берди.
Намойишларнинг иккинчи кунида Трамп тартибсизликларни бостириш учун Миллий гвардиядан 2 минг аскар юборишга қарор қилганини эълон қилиб, Ньюсом ва Лос-Анжелес мери Карен Басс “ўз вазифаларини бажара олмаётганини” таъкидлади.
“Федерал ҳукумат аралашади ва ТАРТИБСИЗЛИК ВА ТАЛОНЧИЛИК муаммосини қандай ҳал қилиш керак бўлса, шундай ҳал қилади!!!”, дея Truth Social’да ёзди у, Ньюсомнинг фамилиясини бузиб, Newscum деб ёзди.
CNN’нинг таъкидлашича, федерал ҳокимият охирги марта 1992 йилда Лос-Анжелесдаги тартибсизликларни бостириш учун Миллий гвардияни жалб этган.
Миллий гвардиячилар иммиграция ва божхона хизмати агентларини, шунингдек, давлат хизматчилари ва федерал мулкни вақтинча ҳимоя қилади. 8 июнь куни кечқурун Лос-Анжелесга дастлабки 300 нафар аскар етиб келган.
Маҳаллий ҳокимият Трампнинг қарорини қаттиқ танқид қилмоқда. Ньюсом Пентагон раҳбари Пит Хегсетга миллий гвардиячиларни жойлаштиришни бекор қилиш талаби билан расмий хат йўллаган. Шунингдек, у Трампни “инқирозни сунъий равишда яратгани” учун истеъфога чиқишга чақирди ва унинг муносабатини “президент эмас, диктаторнинг” хатти-ҳаракатига ўхшатди.
Изоҳ (0)