НАТО давлатлари 2035 йилга келиб мудофаа харажатларини ялпи ички маҳсулотнинг 5 фоизигача ошириш мажбуриятини олди. Бу ҳақда Гаагадаги саммит якунлари бўйича қабул қилинган декларация матнида айтилган.
Ҳужжатда таъкидланишича, Шимолий Атлантика альянси давлатлари “асосий таҳдидлар”, хусусан, Россия томонидан узоқ муддатли хавф олдида бирлашган. Шунингдек, давлатлар Украинани қўллаб-қувватлаш бўйича ўз мажбуриятларини тасдиқлаган.
“Иттифоқчилар Вашингтон шартномасининг 3-моддасига мувофиқ шахсий ва жамоавий мажбуриятларимизни таъминлаш учун 2035 йилгача асосий мудофаа эҳтиёжлари, шунингдек, мудофаа ва хавфсизлик билан боғлиқ харажатлар учун ҳар йили ялпи ички маҳсулотнинг 5 фоизини сарфлаш мажбуриятини олади”, дейилади ҳужжатда.
Ҳужжатда аниқлик киритилишича, НАТО давлатлари асосий мудофаа эҳтиёжларини таъминлаш ва альянснинг ҳарбий имкониятлар соҳасидаги мақсадли кўрсаткичларига эришиш учун ҳар йили ялпи ички маҳсулотнинг камида 3,5 фоизини ажратади. Ялпи ички маҳсулотнинг яна 1,5 фоизи ҳар йили НАТОнинг муҳим инфратузилмаси ва тармоқларини ҳимоя қилиш, мудофаа-саноат базасини мустаҳкамлаш, фуқаролик тайёргарлиги ва барқарорлигини таъминлаш, инновацияларни рағбатлантириш учун сарфланади. Режа доирасидаги харажатлар 2029 йилда стратегик вазият ва альянснинг янгиланган “салоҳият соҳасидаги” мақсадларига мувофиқ қайта кўриб чиқилади.
Шунингдек, НАТО “альянс хавфсизлигига ҳисса қўшадиган” Украинага ёрдам кўрсатиш бўйича ўз мажбуриятларини тасдиқлаган. Мудофаа харажатларини ҳисоблашда мамлакат мудофаа қобилияти ва мудофаа-саноат комплексини қўллаб-қувватлаш учун тўғридан-тўғри бадаллар ҳисобга олинади.
The Telegraph’нинг қўшимча қилишича, коммюнике матни АҚШ президенти Дональд Трамп ва НАТОга аъзо бошқа давлатлар етакчилари ўртасидаги “келишув”га ишора қилмоқда. Хусусан, Украинани қўллаб-қувватлаш қисмида унга нима учун ёрдам кераклиги айтилмаган. Шундай қилиб, бу альянс давлатларининг 2022 йилдан бери биринчи декларацияси бўлиб, унда Россиянинг “ҳарбий махсус операция” ўтказгани учун қораланиши ҳақида маълумотлар йўқ.
Изоҳ (0)