Россияда “Орешник” ўрта масофали баллистик ракетасининг серияли ишлаб чиқарилиши бошланади. Бу ҳақда мамлакат президенти Владимир Путин маълум қилди.
Путиннинг сўзларига кўра, янги қурол “жанг шароитларида ўзини жуда яхши кўрсатган”.
Илгаригидек, устувор йўналишлардан бири, аввало, янги кенг кўламли ва узоқ муддатли қуролланиш дастури доирасида армия ва флотни техник жиҳатдан модернизация қилишдир. Бу борада ядро триадамизга алоҳида эътибор қаратамиз, деган Путин.
Россия президенти стратегик ракета қўшинларига замонавий “Ярс” ракеталари етказиб берилишини айтган. Авиация таркибий қисми 2025 йилда модернизация қилинган Ту-160-М ракета ташувчи самолётлари билан тўлдирилиши керак.
Бундан ташқари, жанговар шароитларда ўзини жуда яхши кўрсатган энг янги ўрта масофали “Орешник” ракета комплексини серияли ишлаб чиқариш бошланмоқда, деган сиёсатчи.
Ҳарбий-денгиз флоти таркибига сўнгги авлод юқори аниқликдаги қирғин қуроллари билан жиҳозланган янги кемалар ва сувости кемалари киради. Путинга кўра, Россияни армия ва қурол-яроғга кенг кўламли маблағ сарфлашга Ғарб ва НАТО мажбур қилмоқда.
НАТОнинг навбатдаги саммитида альянс имкониятларини янада кенгайтириш бўйича катта дастурни бошлаш режалаштирилган. Уни амалга ошириш учун НАТО давлатларининг ҳарбий харажатлари оширилади... Бундан, аслида, глобал милитаризация ва қуролланиш пойгасини ким қўзғатаётгани кўриниб турибди, деган Путин.
У Россия ўз хавфсизлигини таъминлаш учун “тегишли чоралар” кўриши, “суверенитетнинг кафолати” сифатида армияни мустаҳкамлашини айтган.
Стокгольм халқаро тинчлик тадқиқотлари институти (SIPRI) маълумотларига кўра, 2025 йил январь ойига келиб Россия қурол арсеналида 592 та стратегик ракета ташувчи мавжуд эди. Уларнинг ярмидан кўпи — 333 таси қуруқликда жойлаштирилган ракеталарга тўғри келади, жумладан, Путин тилга олган 206 та “Ярс” ракеталарининг ҳар бири 250 килотонна қувватга эга тўртта жанговар каллакни ўз ичига олади.
Бундан ташқари, Россия 78 та “Топол-М” ракетаси, 34 та янги “Авангард” комплекси ва 1980 йилларнинг охиридан буён қуролланишда турган 34 та “Воевода” ракетасига эга.
Изоҳ (0)