Венесуэлада президентлик сайловларидан кейин 2000 нафар намойишчи ҳибсга олинди

Венесуэлада президентлик сайловларидан кейин 2000 нафар намойишчи ҳибсга олинди, дея Deutsche Welle хабар берди.

Бизда 2000 маҳбус бор ва биз уларни максимал хавфсизлик қамоқхоналари Токорон ва Токуйитога жўнатамиз, деди Венесуэла раҳбари Николас Мадуро ўз тарафдорларининг Каракасдаги митингида.

У намойишчиларни “жиноий ҳужумларда, пистирмаларда, тартибсизликларда” айблаган. Шунингдек, у сайловлардаги рақиби Эдмундо Гонсалес қочиб кетгани ва ўзини президент деб эълон қилишдан қўрқаётганини айтган.

Марказий сайлов комиссияси Мадурони ўтган ҳафта бўлиб ўтган сайловларда 51,2 фоиз овоз билан ғолиб деб эълон қилганидан кейин мамлакатда оммавий норозилик намойишлари давом этмоқда. Мухолифат ўз номзоди Гонсалес кўп овоз билан ғалаба қозонганини таъкидлаган. Қўшма Штатлар Гонсалесни сайлов ғолиби деб тан олган ва Лотин Америкасининг кўплаб давлатлари овозларни қайта санашга чақирган.

Шу билан бирга, Украина президенти Владимир Зеленский Венесуэлада ҳукумат қўшинлари билан бирга Россиянинг “Вагнер ХҲК” компаниясининг ёлланма аскарлари ҳам борлиги ҳақидаги хабарлардан хавотир билдирган.

Бу безорилар қаерга бормасин, улар ўлим ва беқарорликни келтириб чиқаради, бу Россиянинг бошқа мамлакатларнинг ишларига аралашуви, шунингдек, дунё бўйлаб вайронагарчиликлар келтириб чиқаришга одатланган стратегиясининг ёрқин намунасидир, дейди Украина раҳбари.