“Вагнер” хусусий ҳарбий кампанияси Украинадаги урушга камида 48 366 маҳбусни ёллаган. Бу ҳақда ҳалок бўлган ёлланма аскарларнинг оилаларига тўловлар бўйича ички ҳужжатларга таяниб, “Медиазона” журналистлари ва BBC хабар берди.
“Вагнер”нинг авиаҳалокатда вафот этган раҳбари Евгений Пригожин 2022 йил ёзида Россия колонияларига бориб, маҳбусларга авф эвазига урушга юборишни таклиф қила бошлаган. Бир неча ой ўтгач, Россия Мудофаа вазирлиги ҳам худди шундай йўл тутган. 2023 йил охирига келиб, “Вагнер” маҳбусларни урушга ёллашни тўхтатган.
Ёлланма аскарларнинг аксарияти Бахмут учун жангларда ҳалок бўлган. У ерда “Вагнер” 19,5 минг кишини йўқотган, улардан 17,1 минг нафари маҳбуслар, 2,4 минг нафари эса “эркин” ёлланма аскарлардир. “Вагнер” расмийлари қаттиқ режимдаги 227 та колониядан 33 минг кишини олиб кетган. Улардан 21 минг нафари Бахмутдан омон қолиб, Россияга қайтган. “Вагнер” 75 та умумий режимли колонияларга ва 28 та махсус режимли колонияларга ташриф буюргани аниқланган.
Изоҳ (0)