Беларусь ҳарбий машқлар ниқоби остида Украина чегараси яқинида кўп сонли шахсий таркиб ва ҳарбий техника тўплади. Бу ҳақда разведка маълумотларига таяниб, Украина Ташқи ишлар вазирлиги хабар берди.
![](/static/2024/08/26/photo_2024-08-26_09-21-12-j9FrRXcK.jpg)
Вазирлик маълумотига кўра, Гомел вилоятида, Украинанинг шимолий чегаралари яқинида махсус операциялар кучлари ходимлари, танклар, артиллерия, реактив тизимлар ва ҳаво мудофааси воситалари тўпланган. Бундан ташқари, Беларусь ҳудудида “Вагнер” хусусий ҳарбий компанияси ёлланма аскарлари ҳам кузатилган.
Украина Ташқи ишлар вазирлиги Беларусь ҳукуматини “Москва босими остида фожиали хатоларга йўл қўймасликка” ва ҳарбий қўмондонликни “дўстона бўлмаган ҳаракатлар”ни тўхтатиб, қўшинларни Украина чегараларидан олиб чиқишга чақирди.
Чегара бузилган тақдирда Украина “ўзини ҳимоя қилиш чоралари”ни кўриши, Беларусь қўшинларининг тўпланиши эса “Украина Қуролли кучлари учун қонуний нишон”га айланиши ҳақида вазирлик огоҳлантирди.
Украина ҳеч қачон Беларусь халқига қарши ҳеч қандай нодўстона ҳаракатлар қилмаганини ва қилмаслигини таъкидлаймиз, дейилади баёнотда.
18 август куни Беларусь раҳбари Александр Лукашенко армиянинг деярли учдан бир қисми Украина чегарасига кўчирилганини маълум қилди. У, шунингдек, Брестдан Гродногача мудофаа истеҳкомлари қурилаётгани ҳақида хабар берди.
Изоҳ (0)