29-сентябр куни эрталаб Кремль матбуот хизмати Россия президенти Владимир Путин мудофаа вазири ўринбосари Юнусбек Евкуров ва “Вагнер” хусусий ҳарбий компанияси командири Андрей Трошев билан учрашув ўтказгани ҳақида хабар берди.
Матбуотга кўра, Путин учрашувни Трошевга мурожаат қилишдан бошлаган. Суҳбатда ҳам, Кремль сайтида ҳам унинг лавозими тилга олинмаган.
“Андрей Николаевич, учрашувимизни сиз билан суҳбатдан бошламоқчиман. Охирги учрашувда сиз турли хил жанговар топшириқларни бажара оладиган, биринчи навбатда, албатта, махсус ҳарбий операция зонасида кўнгилли бўлинмаларни шакллантиришда иштирок этишингиз ҳақида гаплашган эдик. Ўзингиз бундай бўлинмада бир йилдан кўпроқ вақт давомида жанг қилдингиз. Бу нима эканини, қандай амалга оширилганини биласиз, жанговар иш энг яхши ва энг муваффақиятли тарзда давом этиши учун олдиндан ҳал қилиниши керак бўлган масалалар борлигини биласиз”, — деди Путин Трошевга мурожаатида.
Хусусий ҳарбий компания асосчиси Евгений Пригожин томонидан кўтарилган қўзғолондан кейин Путиннинг “Вагнер” командирлари билан учрашувида Трошев ҳам қатнашганди. Путиннинг сўзларига кўра, у ёлланма аскарларга “иш билан таъминлашнинг бир қанча вариантларини” таклиф қилган.
“Буларни айтганимда кўпчилик бош ирғади. Олд қаторда ўтирган ва буни кўрмаган Пригожин эса йўқ, йигитлар бундай қарорга рози эмас, деб айтди”, — деган эди Россия президенти ўша учрашувдан кейин.
Россия президентининг матбуот котиби Дмитрий Песков маълум қилишича, Трошев аллақачон Россия Мудофаа вазирлиги учун ишламоқда. Сентябр ойи охирида аввалига Россия ҳарбий Telegram каналлари, кейин эса Украина Қуролли кучлари вакиллари “Вагнер” ёлланма аскарлари Украинадаги жанговар зоналарга қайтганини эълон қилди.
“Улар қайтишди. Улар қўмондонларни алмаштириб, шу ерга қайтишди”, — деди CNN телеканалига украиналик аскар.
Эслатиб ўтамиз, Евгений Пригожин 23 июнь куни “адолат марши”ни эълон қилганди. “Вагнер” ёлланма аскарлари деярли ҳеч қандай қаршиликка дуч келмай, юзлаб километрларни босиб ўтди. 24 июнь куни Пригожин қўзғолонни тугатди. Бу қарор Пригожин ва Лукашенко ўртасидаги музокаралардан сўнг қабул қилинган, унда Пригожиндан “Беларусга кетиш” сўралган. Россия ҳукумати ёлланма аскарларга бир нечта вариантни таклиф қилди: “Беларусга кетиш”, Россия Мудофаа вазирлиги ёки бошқа ҳуқуқни муҳофаза қилиш органлари билан шартнома тузиш, ҳарбий хизматни тарк этиб, оиласига қайтиш.
23 август куни, исёндан икки ой ўтгач, Пригожиннинг шахсий бизнес самолёти Тверь вилоятида ҳалокатга учради. Оқибатда ўн киши, жумладан, Евгений Пригожин ва “Вагнер” командири Дмитрий Уткин ҳалок бўлди.
Изоҳ (0)