Малида исёнчи гуруҳлар мамлакат армияси устидан улкан ғалабага эришган. Бу ҳақда мамлакатдаги маҳаллий манбаларга таяниб, Al Jazeera нашри хабар берди.
Манбада айтилишича, ҳукуматдан мустақиллик талаб қилаётган, туарег қабиласи аъзоларидан ташкил топган гуруҳлар ҳукумат кучларига ҳужум қилиб, уларнинг ҳарбий позицияларини эгаллаган. Миллий армияга тегишли катта миқдордаги техника ва қуролларни қўлга киритган.
Исёнчилар ҳамда Мали армияси ўртасидаги шиддатли жанглар Жазоир билан чегарада рўй берган. Уч кунлик жангда туарег бўлинмалари коалицияси ҳукумат кучларини ўраб олиб қақшатқич зарба берган.
Тинзаоуатене туманидаги жангларда 7 нафар исёнчи ҳалок бўлгани, 12 нафари яралангани хабар қилинган. Ҳукумат кучлари ичида йўқотиш анча жиддий бўлгани айтилган бўлса-да, ҳалок бўлган аскарлар статистикаси маълум қилинмаган.
Туареглар ҳужуми оқибатида ҳукумат қўшини билан бирга ҳаракат қилаётган Россиянинг “Вагнер” бўлинмаси ҳам жиддий йўқотишга учраган. Бўлинманинг 20 нафар аскари кутилмаган ҳужум оқибатида ҳалок бўлган. Кўплаб рус аскарлари асир олинган.
Мали ҳукумати исёнчилар қўлида замонавий қуроллар ҳамда уруш олиб бориш режаси борлигини билдирган. Мамлакатнинг айрим расмийлари Франция ҳукумати ва “Ал-Қоида” террористик гуруҳини исёнчиларга таъминот юборганликда айблаган.
Маълумот ўрнида туарег қабиласи 2012 йилдан бери ҳукуматга қарши ҳарбий ҳаракатлар уюштириб келади. Улар Кидал шаҳри ва унга туташ шимолий ҳудудларга мустақиллик бериш ва қўшинларни олиб чиқиб кетишни талаб қилиб келган.
Малида Полковник Ассими Гоита бошчилигида 2020 йилда давлат тўнтариши амалга оширилди. Ҳокимиятни эгаллаган Гоита 2022 йилда француз қуролли кучларини мамлакатдан ҳайдаб чиқарди. У мамлакат бирлигини талаб қилди ва ҳеч кимга мухторият берилмаслигини қатъий таъкидлади. Бу эса мамлакат ичидаги айирмачи кучларни фаоллаштириб юборди.
Мали ҳукумати туарегларда ва хорижий мамлакатларда ўзига қарши душманлик кайфиятини сезгач, ёрдам сўраб Россиянинг “Вагнер” ёлланма аскарлари гуруҳига мурожаат қилди. Бунга жавобан Мали шимолида рус ҳарбий штаби базаси ташкил этилган.
Изоҳ (0)