Хитойлик аёл ўзининг икки ўғлини жами 11 600 долларга сотиб, маблағни жонли эфир олиб борувчи стримерларга “совға” тарзида юборди ва ўзига кийим-кечак сотиб олди. Бу ҳақда South China Morning Post хабар берди.
26 ёшли Ҳуанг иккинчи фарзандини фақат сотиш мақсадида дунёга келтиргани аниқланган. У Гуанси провинциясидан бўлиб, фақат бошланғич мактабни тамомлаган. Кейинчалик Фучжоу шаҳрига кўчиб ўтиб, турли майда ишлар билан кун кечирган.
Ҳуанг болалигида асраб олинган, тарбияловчи ота-онасининг лоқайдлиги сабабли эрта ёшдаёқ уйдан чиқиб кетган. У 2020 йил октябрь ойида биринчи ўғлини дунёга келтирган. Аммо молиявий қийинчиликлар ва боланинг отасининг йўқлиги уни бола тарбиясидан воз кечишга мажбур қилган. Аёл қийинчиликдан қутулиш учун чақалоқни сотишга қарор қилган.
Уй эгаси (ижара берувчи) Ҳуангнинг режаларидан хабар топиб, бепушт қариндошига бу ҳақда маълумот берган. Натижада бола 45 000 юан (тахминан 6 300 доллар) эвазига сотилган. Аёл ўша пулнинг барчасини стримерларга хайрия тарзида юборган.
Пул тугагач, Ҳуанг янада кескинроқ чорага қўл урган. У атайлаб эркаклар билан жинсий алоқа қилиб, яна бола кўриш ва уни сотиш орқали фойда кўрмоқчи бўлган.
2022 йилда у иккинчи ўғли — Гуюни дунёга келтириб, уни 38 000 юан (5 300 доллар) эвазига воситачига сотган. Воситачи эса чақалоқни 103 000 юан (14 000 доллар) эвазига бошқа бир харидорга қайта сотган. Ҳуанг бу пулни ҳам стримерларга юборган, шунингдек, кийим-кечак ва бошқа ҳашаматли буюмлар харид қилган.
2022 йил 13 апрелда Ҳуанг фирибгарликда гумонланиб ушланган. Тергов давомида унинг телефонидан болаларни сотиш билан боғлиқ ёзишмалар топилган. Иккала бола ҳам апрель ойида полиция томонидан топилган ва ҳозирда маҳаллий фуқаролик ишлари бошқармаси қарамоғида, асраб олиниши кутилмоқда.
2022 йил 8 июлда суд Ҳуангни одам савдоси ва фирибгарлик учун 5 йил 2 ойга озодликдан маҳрум қилган, унга 30 000 юан (4 000 доллар) жарима ҳам белгиланган. Биринчи болани сотиб олган шахс 9 ойга озодликдан маҳрум этилган. Ҳуангга уйини ижарага берган эркак эса 7 ойга қамоқ жазосига ҳукм қилинган.
Изоҳ (0)