Грецияда қирувчи самолётлар ва аэрокосмик саноат объектларини суратга олаётган тўрт нафар Хитой фуқароси қўлга олинди. Бу ҳақда Protothema нашри хабар берди.
Хитой фуқаролари Танагра шаҳрида жойлашган ҳарбий объектларни суратга олаётган вақтда ушланган. Уларнинг ҳаракатлари шубҳа уйғотган ва “жосуслик” гумони билан текширувга сабаб бўлган. Хусусан, суратлар орасида Рафале русумидаги қирувчи самолётлар акс этгани аниқланган.
Қўлга олинганлар — икки эркак, бир аёл ва бир йигит — дастлаб Греция аэрокосмик саноати хавфсизлик ходимлари томонидан пайқаб қолинган. Хавфсизлик хизмати улардан ҳудудни тарк этишни сўраган. Бироқ улар бу талабга бўйсунмай, яқин атрофдаги кўприкка ўтиб, суратга олишни давом эттирган.
Воқеа ҳақида зудлик билан 114-жанговар қанот Ҳарбий-ҳаво кучлари полициясига хабар берилган. Сўнгра чет элликлар ушланиб, сўроққа олиб кетилган ва кейинроқ маҳаллий полицияга топширилган.
Улар билан бирга ҳарбий ҳудуддан олинган катта ҳажмдаги фотоматериаллар аниқланган. Ҳозирда расмийлар бу ҳодиса тасодифми ёки разведка маълумотларини тўплашга қаратилган махсус операциянинг бир қисмими — шуни аниқлаш устида ишламоқда.
Бу иш жиддий назорат остида. Махсус хизматлар аллақачон мавжуд далилларни ўрганишга киришган, дейилади нашр хабарида.
Маълумот учун, 9 июль куни Украина хавфсизлик хизмати Киевда икки нафар Хитой фуқаросини жосусликда гумонлаб қўлга олган эди. Терговга кўра, улар Украина томонидан ишлаб чиқилган “Нептун” ракета тизими ҳақида маълумот тўплаётган бўлган.
Изоҳ (0)