Хитой лазер ёрдамида Германия самолётига ҳужум қилгани ҳақидаги айбловларни рад этди. Бу ҳақда Хитой Ташқи ишлар вазирлигига таяниб, Anadolu хабар берди.

Германия томонига кўра, ҳодиса Европа Иттифоқининг фуқаролик кемаларини ҳусийлар ҳужумидан ҳимоя қилаётганда юз берган. Немис самолёти ҳудудда патруллик қилаётганида Хитой лазерининг ҳужумига учраган.
Германия ходимларини хавф остига қўйиш ва операцияни барбод қилишга уринишларни мутлақо қабул қилиб бўлмайди, деган Германия Ташқи ишлар вазирлиги.
Шундан сўнг Берлин Хитой элчисини изоҳ бериш учун Ташқи ишлар вазирлигига чақирган. Хитой ТИВ эса айбловларни инкор этмоқда.
Германия баёнотлари ҳақиқатга мутлақо тўғри келмайди, деган вазирлик матбуот котиби Мао Нинг.
У Хитой “буюк давлат сифатида ўз мажбуриятларини бажараётгани ва халқаро денгиз йўллари хавфсизлигига ҳисса қўшаётгани”ни айтган. Хитой “ҳар икки томон ҳам тушунмовчиликлар ва хато қарорлардан қочиш учун фактларга асосланган мулоқотни кучайтириш”га чақирган.
Германия ташқи ишлар вазири Йоханн Вадефул ҳам немис оммавий ахборот воситалари учун ушбу ҳодиса юзасидан фикр билдирган. У Хитой билан “тенг ҳуқуқли асосда” ҳамкорлик қилишни исташини айтган. Бироқ мамлакатдан бўлиб ўтган воқеага изоҳ беришни талаб қилган.
Изоҳ (0)