Хитой ва Ўзбекистон ўртасида контейнер ташувларига ихтисослашган UTK International Logistics Cо. Ltd қўшма корхонаси ташкил этилди. Бу ҳақда Транспорт вазирлиги хабар қилди.
Қайд этилишича, 10 июлда Пекин шаҳрида “Ўзтемирйўлконтейнер” АЖ ва Xinjiang Union of Railway International Logistics Cо. Ltd ўртасидаги ҳамкорлик доирасида ушбу қўшма корхона ташкил этилиши муносабати билан тантанали очилиш маросими бўлиб ўтди.
Тадбир давомида янги корхонанинг Хитой ва Ўзбекистон ўртасидаги транспорт-логистика ҳамкорлигини чуқурлаштиришдаги стратегик аҳамияти алоҳида таъкидланди. Томонлар мазкур компания ўзаро юк ташувларини кенгайтиришда муҳим ўрин эгаллашига ишонч билдирди.
UTK International Logistics Cо. Ltd компаниясининг офиси Урумчи шаҳрида жойлашиб, корхонанинг асосий фаолияти юкларни консолидация қилиш, Хитой томонидан субсидиялар жалб этиш ҳамда Хитой—Марказий Осиё йўналиши бўйича мултимодал ташувларни ривожлантиришдан иборат бўлади.
Ташкилий жараёнлар якунлангач, компания қисқа фурсат ичида Хитой—Қирғизистон—Ўзбекистон йўналиши бўйича биринчи контейнер поездларини жўнатишни бошлайди.
“UTK International Logistics Cо. Ltd қўшма корхонасининг ташкил этилиши Хитой ва Ўзбекистон ўртасидаги транспорт алоқаларини мустаҳкамлаш, шунингдек, Ўзбекистоннинг логистика соҳасидаги стратегик ўрнини янада кучайтиришга хизмат қилади”, дейилади хабарда.
“Ўзтемирйўлконтейнер” АЖ маълумотларига кўра, мамлакатда 2030 йилга қадар контейнер ташувлари ҳажмини камида 1,5 бараварга ошириш мақсад қилинган.
Хитойнинг Gansu International Logistics Group логистика компанияси билан Хитой—Қирғизистон—Ўзбекистон—Тожикистон / Туркманистон йўналиши бўйича контейнер поэздларини йўлга қўйиш бўйича келишувга эришилди. Илк қатнов 2025 йилнинг учинчи чорагига режалаштирилган.
Изоҳ (0)