“Пари Сен-Жермен” бош мураббийи Луис Энрике Клублар ўртасидаги Жаҳон чемпионати ярим финали доирасида Мадриднинг “Реал” клубига қарши кечган баҳсда қўлга киритилган йирик ғалаба (4:0)дан сўнг ўйинга доир фикрларини билдириб ўтди.
Матбуот анжуманида Энрике қуйидагича изоҳ берди:
Телефоним “Барселона” мухлисларининг хабарлари билан тўлиб кетган — бу ҳолат ўйиннинг нақадар муҳимлигини кўрсатади. Сен клуб рамзи учун бор кучингни берасан. Айниқса, рақиб “Реал” бўлса, бу иштиёқ икки ҳисса ошади.
Уларнинг қандай жамоалиги, қандай кучга эга эканини яхши биламиз — улар ҳар доим шундай бўлиб қолишади. Биз ортга чекинмадик, лекин жазирама иссиқ, уч кундан кейинги финал ва чарчоқ хавфини ҳисобга олиб, эҳтиёткорлик билан ҳаракат қилишга мажбур бўлдик.
Асосий мақсад — финалда ғалаба қозониш. Аммо ҳеч қандай ҳолатда тўхтаб қолмаслигимиз керак. Мақсадимизга жуда яқинмиз, тарих ёзмоқчимиз, шундан кейин эса ҳордиқ чиқарамиз, — дея Энрикенинг сўзларини келтиради The Guardian.
Маълумот учун, “ПСЖ” — “Реал” баҳсида парижликлар рақибга деярли ҳеч қандай имкон қолдирмай, ишончли тарзда финал йўлланмасини қўлга киритди. Энди улар ҳал қилувчи баҳсда Лондоннинг “Челси” жамоасига қарши майдонга тушади.
Изоҳ (0)