“Манчестер Сити” ёки “Интер” ҳужумчиси тарихда қолади. Бир мавсумда ҳам ЕЧЛ, ҳам ЖЧ кубогини қўлга киритган тўққиз футболчи ҳақида

Жаҳон Чемпионати ва Европа Чемпионлар Лигасида ғалаба қозониш ҳар қандай футболчининг орзуси. “Манчестер Сити” ҳужумчиси Хулиан Альварес ёки “Интер” форварди Лаутаро Мартинес бу икки совринни бир мавсумда қўлга киритган футболчига айланиши мумкин. Ҳужумчилар 2022 йилнинг декабрь ойида Аргентина терма жамоаси билан Қатарда бўлиб ўтган мундиалда ғолиб чиққанди. Маълумот учун, айнан шу икки футболчи терма жамоада асосий таркиб учун рақобатлашганди. Июнь ойида эса улар ЕЧЛ ғолиблиги учун курашади.

Альварес ёки Мартинес бир мавсумда “мукаммал дубль” қайд этган биринчи футболчи бўлмайди. Футбол тарихида бундай натижага тўққиз нафар ўйинчи эришган. Лекин уларнинг ҳеч қайсиси Аргентина терма жамоаси ёки “Манчестер Сити” ва “Интер” клубларидан бўлмаган. Қуйида бир мавсум ичида ҳам мундиал, ҳам ЕЧЛда ғолиб чиққан футболчилар ҳақида сўз боради.

Зепп Майер, Франс Беккенбауэр, Ҳанс-Георг Шварценбек, Паул Брайтнер, Ули Ҳёнесс ва Герд Мюллер.

1974 йилда олти нафар германиялик футболчи имконсиз нарсани амалга оширди. Улар икки ой ичида ҳам Чемпионлар Кубогида, ҳам Жаҳон Чемпионатида зафар қучган. Аввалига дарвозабон Майер, ҳимоячилар Беккенбауэр, Шварценбек, Брайтнер, ярим ҳимоячи Ҳёнесс ва ҳужумчи Мюллер “Бавария” сафида Чемпионлар Кубогида ғолиб чиқди.

Кубок йўли мюнхенликлар учун осон бўлиб чиқмади. Жамоа биринчи раунддаёқ мусобақадан чиқиб кетиши мумкин эди. “Бавария” Швециянинг “Отвидаберг” жамоаси устидан пенальтилар сериясида ғалаба қозонган. Иккинчи раундда эса Дрезденнинг “Динамо”сига қарши ақл-бовар қилмас ўйинлар ўтказди — ўз майдонида 4:3, меҳмонда эса 3:3 ҳисоби қайд этилди. Чорак финалда эса Болгариянинг “ЦСКА” жамоасига қарши ишончли ўйинлар ўтказди, ярим финалда Венгриянинг “Уйпешт” клубини жавоб ўйинидаги йирик ғалаба эвазига доғда қолдирди. Брюссел шаҳрида ўтказилган “Атлетико”га қарши финал ўйинини эса қайта ўтказишга тўғри келди, чунки жамоалар 1:1 ҳисобида дуранг ўйнаганди. Эътиборлиси, Шварценбек 120-дақиқадаги голи билан “Бавария”ни мағлубиятдан қутқариб қолганди. Мюнхенликларнинг ҳақиқий триумфи иккинчи ўйинда содир бўлди. Клуб Ҳёнесс ва Мюллернинг дубллари эвазига “Атлетико”ни 4:0 ҳисобида мағлуб этди.

1974 йилги Жаҳон Чемпионати ГФРда бўлиб ўтди ва бу вазифани осонлаштирди. Биринчи босқичда ГДР, Чили ва Австралияни мағлуб этди, иккинчи босқичда эса Польша, Швеция ва Югославия терма жамоалари устидан ғалаба қозонди. Мюнхен шаҳрида ўтказилган Нидерландияга қарши финал омадсиз бошланди. Лолалар юрти вакиллари иккинчи дақиқадаёқ пенальтидан ҳисобни очди. Танаффусгача Брайтнер ва Мюллернинг голлари немисларга ҳисобда олдинга чиқиб олишга ёрдам берди. Учрашув 2:1 ҳисобида якунланди ва ГФР жаҳон чемпионига айланди.

Беккенбауэр ГФР терма жамоасининг ҳам, “Бавария”нинг ҳам сардори эди. У мамлакатда 1974 йилнинг энг яхши футболчиси деб тан олинди. Шунга қарамай “Олтин тўп” учун курашда Ёҳан Кройффга мағлуб бўлди. Мюллер эса саккизта гол билан Чемпионлар Кубоги тўпурари бўлганди.

Кристиан Карамбё

Кристиан Карамбё Янги Каледонияда туғилган, Франция терма жамоасида ўйнаган ва фаолиятидаги юлдузлик онларини Мадридда ўтказган. Ярим ҳимоячи 1998 йилда аввалига “Реал Мадрид” билан Чемпионлар Лигасида, кейин эса “учранглилар” билан Жаҳон чемпионатида ғолиб чиққан.

“Реал Мадрид” Карамбёни 1998 йилнинг январида “Сампдория”дан сотиб олган. Кристиан Чемпионлар Лигаси плей-офф босқичидаги барча ўйинларни асосий таркибда бошлаган ва илк учта ўйинда (“Байер”га қарши чорак финалнинг икки ўйинида ва “Боруссия Д”га қарши ярим финалнинг биринчи учрашувида) гол урган. “Реал” 1:0 ҳисобида ғалаба қозонган “Ювентус”га қарши финал ўйинида 90 дақиқа майдонда ҳаракат қилган.

Бир ойдан кейин ярим ҳимоячи Франция мезбонлик қилган Жаҳон Чемпионатида иштирок этган. Бироқ Кристиан чорак финалгача захира ўйинчиси бўлган. Ярим финалда эса жароҳат туфайли 30-дақиқада алмаштирилган. Шунга қарамай Бразилияга (3:0) қарши финал учрашувида 60 дақиқага яқин майдонда ҳаракат қилганди.

Роберто Карлос

Ҳимоячи Роберто Карлос клублар ўртасидаги энг қимматли Кубокни “Реал Мадрид” сафида 2001/02 йилги мавсумда қўлга киритган. Бир ярим ой ўтиб эса Бразилия терма жамоаси билан жаҳон чемпиони бўлган.

Роберто Карлос у пайтда 30 ёшда эди ва фаолиятидаги энг яхши вақтларини ўтказаётганди. “Реал” Чемпионлар Лигасининг биринчи босқичида “Рома”, “Локомотив” ва “Андерлехт” жойлашган гуруҳдан ўтган бўлса, иккинчи босқичда “Панатинаикос”, “Спарта” ва “Порту”ни доғда қолдирди. Чорак финалда “Бавария”, ярим финалда эса азалий рақиб “Барселона” мағлуб этилди. Финалда эса “қаймоқранглилар” “Байер” устидан 2:1 ҳисобида ғалаба қозонди.

2002 йилги Жаҳон Чемпионатида Бразилия Роберто Карлос билан Туркия, Коста-Рика ва Хитой ўрин олган гуруҳда ғолиб чиққан, кейин эса плей-оффда Бельгия, Англия ва Туркияни енгди. Финалда бразилияликлар Германияни мағлуб этди – 2:0. Чап қанот ҳимоясида ҳаракат қиладиган футболчи тўлиқ ўйин ўтказди.

2002 йилда Роберто Карлос “Олтин тўп”ни қўлга киритиши мумкин эди. Бироқ овоз беришда ватандоши Роналдодан бир оз ортда қолди ва иккинчи ўринни эгаллади.

Рафаэл Варан

Ҳимоячи 2018 йилда Россиядаги Жаҳон чемпионатида ғолиб чиққан. Ундан аввалроқ “Реал” билан Чемпионлар Лигасини ютганди. “Қаймоқранглилар” “Тоттенҳэм”, “Интер” ва “АПОЭЛ” билан бир гуруҳдан ўрин олди ва иккинчи ўринни эгаллади. “Қироллик клуби” 1/8 финалда “ПСЖ”ни, чорак финалда “Ювентус”ни, ярим финалда “Бавария”ни мусобақадан чиқариб юборди. Финалда эса “Ливерпуль” 3:1 ҳисобида таслим этилди.

Варан Россияда бўлиб ўтган мундиалда Франция терма жамоасининг барча ўйинларида иштирок этди — биринчи дақиқадан охирги дақиқагача. Чорак финалдан ўрин олган Уругвайга қарши ўйинда ғалаба тўпини киритди. Французлар Дания, Перу ва Австралия ўрин олган гуруҳдан чиқди. Плей-оффда голларга бой ўйинда Аргентина 4:3 ҳисобида мағлуб этилди. Чорак финалда Уругвай, ярим финалда эса Бельгия билан доғда қолдирилди. “Лужники”да бўлиб ўтган финалда Дидье Дешам шогирдлари хорватларни 4:2 ҳисобида мағлуб этиб, чемпионга айланди.

“Манчестер Сити” футболчиси Хулиан Альварес ёки “Интер” форварди Лаутаро Мартинес олтин дублга эришган тарихдаги ўнинчи футболчига айланиши мумкин.

Эслатиб ўтамиз, “Манчестер Сити” ва “Интер” ўртасидаги ЕЧЛ финали 10 июндан 11 июнга ўтар кечаси 00:00 да старт олади.