Ҳиндистоннинг Гужарат штатидаги Маҳисагар дарёси устидаги Гамбҳир кўпригининг бир қисми қулаб тушиши оқибатида камида ўн киши ҳаётдан кўз юмган, яна олти киши тан жароҳати олган. Бу ҳақда The Times of India нашри хабар бермоқда.
Дастлабки маълумотларга кўра, Вадодара ва Ананд туманларини боғловчи 900 метр узунликдаги кўприкнинг иккита устуни орасидаги оралиқ қулаб тушган. Кўприк ўпирилиши пайтида ундан ўтаётган юк машинаси, фургон ва енгил автомобиль дарёга тушган.
Ананд туманидан сайланган парламент аъзоси Митеш Пателнинг маълум қилишича, ҳозирга қадар учта жасад топилган, яна тўрт киши қутқариб олинган.
“Қутқарув ишлари Вадодара ва Ананд туманлари маъмурлари раҳбарлигида давом этмоқда”, дея таъкидлади у.
Маҳаллий аҳоли биринчи бўлиб ёрдамга шошилган ва фавқулодда хизматларни чақирган. Воқеа жойида полиция, ўт ўчирувчилар ва қутқарувчилар фаолият олиб бормоқда.
“Кўприкнинг бир қисми тўсатдан қулаб тушди. Айни пайтда ўтиб кетаётган учта автомобиль дарёга тушиб кетди. Биз дарҳол қутқарув ишларини бошладик ва 10 кишини дарёдан чиқариб олдик”, деди ёнғин хавфсизлиги ходими.
Қутқарув операцияси давом этмоқда. Ҳокимият органлари қулаш сабабларини аниқламоқда.
Гамбҳир кўприги Вадодарадан (Гужарат штатидаги учинчи йирик шаҳар) тахминан 25 км узоқликда жойлашган бўлиб, минтақанинг транспорт алоқасида муҳим аҳамиятга эга.
Гужарат штати ички ишлар вазири Ҳарш Сангҳавининг маълум қилишича, воқеа жойига юқори мартабали вакиллар гуруҳи юборилган, штат бош вазири Бҳупендра Пател шахсан вазиятни назорат қилмоқда.
Бош вазир 1985 йилда қурилган кўприкка мунтазам равишда техник хизмат кўрсатиб келинганини таъкидлаган ва фожиа сабаблари батафсил текширилишини ваъда берган.
Бундан аввал Непалнинг шимолий қисмида юз берган кучли сув тошқини мамлакатни Хитой билан боғловчи Митери кўпригини вайрон қилгани хабар қилинганди.
Изоҳ (0)