61 ёшли Жефф Безос ва 55 ёшли Лорен Санчес Венецияда нишонлаётган тўй маросими муносабати билан меҳмонлардан уларга совға бермасликни сўрашди. Улар дўстларининг бу тарихий шаҳарга хайрия қилишини истайди.
Бу ҳақда People нашрига Венеция муниципалитетининг савдо ва ишлаб чиқариш масалалари бўйича масъул маслаҳатчиси Себастьяно Косталонга маълум қилди.
“Безос совғалар келин-куёвга эмас, балки Венецияга берилиши кераклигини айтди”, деди у ва “жуда заифлашиб қолган шаҳарни ободонлаштириш учун маблағ олишдан жуда хурсанд” эканликларини қўшимча қилди.
Amazon асосчиси ва унинг бўлажак турмуш ўртоғининг бундай баёнот бериши Венециянинг тарихий марказида тўйга қарши норозилик плакатлари пайдо бўлаётган пайтга тўғри келди. Шаҳарнинг кўплаб аҳолиси бу тадбирга салбий муносабат билдирган эди. Бироқ Себастьянонинг айтишича, венецияликларнинг аксарияти бундай тадбирларга хотиржам муносабатда.
Эслатиб ўтамиз, дунёнинг энг бой инсонларидан бири ҳисобланган Жефф Безоснинг тўйи 27–29 июнь кунлари бўлиб ўтади. Маросимда тахминан 250 нафар меҳмон иштирок этиши кутилмоқда.
Фото: Паге Сих
Жефф Безос ва Лорен Санчес унаштирилганига деярли 2 йил бўлди. 2023 йил май ойида 5 йиллик муносабатлардан сўнг Безос Санчесга турмуш қуришни таклиф қилган.
Изоҳ (0)