Миср ҳукумати томонидан Ўзбекистонга инсонпарварлик ёрдами сифатида ажратилган гепатит C га қарши дори воситасининг навбатдаги партияси Тошкентга етказилди, деб хабар қилмоқда 22 июнь куни “Дунё” ахборот агентлиги.
Бу 2025 йилдаги 4-партия бўлиб, 32 дона қутидан иборат 7680 дона “Софосбувир-400мг” дори воситаларини ўз ичига олади.
Ўзбекистонда гепатит C ни 2030 йилга қадар бартараф этиш бўйича миллий дастур ижроси доирасида дори воситалари Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморларга тақсимланади.
Ўзбекистон элчихонаси маълумотига кўра, Миср ҳукумати томонидан 2023—2024 йиллар давомида ушбу вирусга қарши вазни 12,4 тонна бўлган “Даклатасвир” ва “Софосбувир” дори воситаларининг 27 та партияси мамлакатга етказиб берилган. Мазкур дори воситаларининг умумий қиймати 1,4 миллион долларга тенг.
1 июнь куни Мисрдан C гепатити касаллигига қарши дори воситаларининг 2025 йилдаги илк партияси олиб келинганди. 9 июнда иккинчи партияси, 15 июнда учинчи партияси келтирилди. Миср ҳукумати томонидан тақдим этилган ушбу дорилар давлат бюджети маблағларини тежашга ёрдам беради.
Изоҳ (0)