Гепатит C га қарши препаратнинг 18-партияси “Софосбувир-400 мг” 5600 ўрамда Мисрдан Тошкентга етиб келди, деб хабар бермоқда “Дунё” АА.
Ўзбекистоннинг Қоҳирадаги элчихонаси хабарига кўра, дори воситалари Соғлиқни сақлаш вазирлигининг Вирусология илмий-текшириш институтига юборилган. Улардан мазкур тиббиёт муассасасида даволанаётган беморлар бепул фойдаланади.
Миср ҳукумати томонидан Ўзбекистонга ҳозиргача етказиб берилган 800 минг дона ушбу дори воситаси 133 минг беморнинг даволанишига бўлган эҳтиёжни қондиради.
Эслатиб ўтамиз, мазкур гуманитар акция Ўзбекистон президентининг 2023 йил 20—21 февраль кунлари Мисрга расмий ташрифи ва Миср Соғлиқни сақлаш вазирлиги билан музокаралар чоғида эришилган келишувларга мувофиқ амалга оширилмоқда. Гуманитар ёрдам гепатит билан касалланган беморларни қўллаб-қувватлаш ва уларни давлат ҳисобидан даволашга ёрдам беради.
Ушбу дори воситаларини етказиб бериш 29 апрель куни бошланганди. 4 ноябрь куни дориларнинг 17-партияси етказиб берилганди.
Изоҳ (0)