Мисрдан гепатит C га қарши дори воситаларининг ўн бешинчи партияси Ўзбекистонга етказилди, деб хабар бермоқда “Дунё” АА.
Маълум қилинишича, 23-сентябр куни Uzbekistan Airways Миср ҳукумати томонидан мамлакатимизга инсонпарварлик ёрдам сифатида ажратилган 6240 дона “Софосбувир-400мг” дори воситасининг ўн бешинчи туркумини Шарм аш-Шайхдан Тошкентга етказиб берди.
Ушбу дори воситалари Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморлар ўртасида тақсимланади.
Хабарда айтилишича, Миср соғлиқни сақлаш вазири 2023 йил февраль ойида Қоҳирага олий даражадаги ташриф доирасида Ўзбекистон ССВ билан имзоланган ҳамкорлик меморандуми ижроси ва ўзаро манфаатли лойиҳаларни амалга ошириш истиқболларини муҳокама қилиш, шунингдек, C гепатитига қарши курашда ўзаро ҳамкорликни янада кенгайтириш учун амалий сафар билан Тошкентга келмоқчи.
Миср гепатит B ва C вирусларига қарши курашда дунё миқёсида сезиларли муваффақиятларга эришган давлатдир. Миср Соғлиқни сақлаш вазирлиги маълумотларига кўра, мамлакат аҳолиси ушбу касалликдан бутунлай фориғ этилган бўлиб, Миср олимлари яратилган махсус диагностика аппаратлари ва орттирилган тажрибани ўзбек мутахассислари билан баҳам кўришга тайёр.
Ушбу дори воситаларини етказиб бериш 29 апрель куни бошланганди. 19 август куни дориларнинг 14-партияси етказиб берилди.