Миср ҳукумати томонидан Ўзбекистон учун инсонпарварлик ёрдами тариқасида ажратилган гепатит C га қарши дори воситаларининг 16-партияси Ўзбекистонга етказилди, деб хабар бермоқда “Дунё” АА.
Таъкидланишича, ушбу лойиҳа Ўзбекистон президентининг Мисрга амалга оширган расмий ташрифи давомида эришилган келишувлар ҳамда давлат раҳбарининг С гепатитига чалинган беморларни 100 фоиз давлат ҳисобидан даволаш бўйича ташаббуси ижроси доирасида амалга оширилмоқда.
“Софосбувир-400 мг” дори воситасининг навбатдаги туркумини Ўзбекистонга жўнатиш бўйича келишув 2023 йил 3 октябрь куни мамлакат дипломатларининг Миср соғлиқни сақлаш вазирининг ўринбосари Муҳаммад Ҳасаний билан олиб борган самарали музокаралари натижасидир.
Муҳаммад Ҳасаний мулоқот чоғида Ўзбекистонда гепатит C дан даволанаётган беморларга кўмак беришни давом эттириш учун Миср Соғлиқни сақлаш вазирлигида жорий лойиҳани давом эттиришдан мамнунлигини ва гуманитар ёрдамнинг 16-туркуми доирасида С гепатитига қарши “Софосбувир-400мг” дори воситаларини етказиб берилишини билдирган.
Умумий қиймати 38 минг 456 АҚШ долларига тенг бўлган 3680 дона “Софосбувир-400мг” дори воситалари 21 октябрь куни Шарм аш-Шайхдан Тошкентга Uzbekistan Airways кўмагида етказиб берилди.
Ушбу дори воситаларини етказиб бериш 29 апрель куни бошланганди. 23 сентябрь куни дориларнинг 15-партияси етказиб берилди.
Изоҳ (0)