Misr hukumati tomonidan beg‘araz taqdim etilgan gepatit C ga qarshi dori vositalarining uchinchi partiyasi O‘zbekistonga yetkazib berildi, deb xabar qildi 15-iyun kuni “Dunyo” axborot agentligi.
O‘zbekiston elchixonasi va Misr Sog‘liqni saqlash vazirligi rahbariyati o‘rtasida o‘tkazilgan muzokaralar natijasida erishilgan kelishuvlarga binoan, umumiy qiymati 114 829 dollar bo‘lgan 28 dona qutidagi 7440 dona “Sofosbuvir-400mg” dori vositalarining 2025-yildagi uchinchi partiyasi Sharm ash-Shayxdan Toshkentga Uzbekistan Airways ko‘magida olib kelindi.
Mazkur dori vositalari Sog‘liqni saqlash vazirligi huzuridagi Virusologiya ilmiy-tekshirish institutiga taqdim etiladi va ular shifotalab bemorlar o‘rtasida taqsimlanadi.
1-iyun kuni Misrdan C gepatiti kasalligiga qarshi dori vositalarining 2025-yildagi ilk partiyasi olib kelingandi. 9-iyunda ikkinchi partiyasi keltirildi.
O‘zbekistonning Qohiradagi elchixonasi ma’lumotiga ko‘ra, Misr hukumati tomonidan 2023—2024-yillar davomida ushbu virusiga qarshi vazni 12,4 tonna bo‘lgan “Daklatasvir” va “Sofosbuvir” dori vositalarining 27 ta partiyasi mamlakatga yetkazib berilgan. Mazkur dori vositalarining umumiy qiymati 1,4 million dollarni tashkil etadi.
Prezident qaroriga ko‘ra, 2023—2025-yillar davomida virusli gepatitning C turi bilan kasallangan 42 ming nafar bemorni (har yili 10,5 mingdan) davolash rejalashtirilgan. Mamlakatni 2030-yilgacha gepatit C dan xoli hudud maqomiga erishish maqsad qilingan.
Sanitariya-epidemiologik osoyishtalik va jamoat salomatligi qo‘mitasi bergan ma’lumotga ko‘ra, o‘tgan davr mobaynida gepatit C virusiga qarshi dori vositalari yordamida 41 801 nafar bemor kasallikdan samarali davolangan.
Izoh (0)