Миср ҳукумати томонидан беғараз тақдим этилган гепатит C га қарши дори воситаларининг учинчи партияси Ўзбекистонга етказиб берилди, деб хабар қилди 15 июнь куни “Дунё” ахборот агентлиги.
Ўзбекистон элчихонаси ва Миср Соғлиқни сақлаш вазирлиги раҳбарияти ўртасида ўтказилган музокаралар натижасида эришилган келишувларга биноан, умумий қиймати 114 829 доллар бўлган 28 дона қутидаги 7440 дона “Софосбувир-400мг” дори воситаларининг 2025 йилдаги учинчи партияси Шарм аш-Шайхдан Тошкентга Uzbekistan Airways кўмагида олиб келинди.
Мазкур дори воситалари Соғлиқни сақлаш вазирлиги ҳузуридаги Вирусология илмий-текшириш институтига тақдим этилади ва улар шифоталаб беморлар ўртасида тақсимланади.
1 июнь куни Мисрдан C гепатити касаллигига қарши дори воситаларининг 2025 йилдаги илк партияси олиб келинганди. 9 июнда иккинчи партияси келтирилди.
Ўзбекистоннинг Қоҳирадаги элчихонаси маълумотига кўра, Миср ҳукумати томонидан 2023—2024 йиллар давомида ушбу вирусига қарши вазни 12,4 тонна бўлган “Даклатасвир” ва “Софосбувир” дори воситаларининг 27 та партияси мамлакатга етказиб берилган. Мазкур дори воситаларининг умумий қиймати 1,4 миллион долларни ташкил этади.
Президент қарорига кўра, 2023—2025 йиллар давомида вирусли гепатитнинг C тури билан касалланган 42 минг нафар беморни (ҳар йили 10,5 мингдан) даволаш режалаштирилган. Мамлакатни 2030 йилгача гепатит C дан холи ҳудуд мақомига эришиш мақсад қилинган.
Санитария-эпидемиологик осойишталик ва жамоат саломатлиги қўмитаси берган маълумотга кўра, ўтган давр мобайнида гепатит C вирусига қарши дори воситалари ёрдамида 41 801 нафар бемор касалликдан самарали даволанган.
Изоҳ (0)