O‘zbekiston elchixonasi tashabbusi bilan Misrdan C gepatiti kasalligiga qarshi dori vositalarining 2025-yildagi ilk partiyasi olib kelindi, deb xabar bermoqda “Dunyo” axborot agentligi.
Ta’kidlanishicha ushbu insonparvarlik loyihasi davlat rahbarining mamlakatda C gepatitini 100 foiz davolash bo‘yicha tashabbusi ijrosi doirasida amalga oshirildi.
O‘zbekiston diplomatik vakolatxonasi va Misr Sog‘liqni saqlash vazirligi rahbariyati o‘rtasida o‘tkazilgan muzokaralar natijasida umumiy qiymati 114 829 AQSH dollariga teng 31 ta qutida 7 440 dona bo‘lgan C gepatitiga qarshi Sofosbuvir-400mg dori vositasini O‘zbekistonda beg‘araz insonparvarlik ko‘magi sifatida taqdim etilishiga erishildi.
Mazkur dori vositalari 31-may kuni Uzbekistan Airways samolyotida Sharm ash-Shay—Toshkent reysi bo‘yicha O‘zbekistonga olib kelindi.
Bu dori vositalari O‘zbekistonda C gepatitini 2030-yilga qadar bartaraf etish bo‘yicha milliy dasturga asosan Sog‘liqni saqlash vazirligi huzuridagi Virusologiya ilmiy-tekshirish institutiga taqdim etiladi.
O‘zbekiston elchixonasi xabariga ko‘ra, 2023—2024-yillarda Misr hukumati tomonidan mamlakatga C gepatitiga qarshi kurashish uchun umumiy vazni 12,4 tonna Daclatasvir va Sofosbuvir dori vositalari 27 partiyada insonparvarlik ko‘magi sifatida berilgan. Mazkur dori vositalarining umumiy qiymati 1,4 million AQSH dollariga teng.
Mutaxassislar hisob-kitobiga ko‘ra, bir nafar bemorning 3 oylik to‘liq davolash kursi uchun 3 qadoq Daclatasvir va 3 qadoq Sofosbuvir kerak bo‘ladi.
Izoh (1)
Bu dorini qayerdan olsam bo'ladi