Мисрдан Ўзбекистонга гепатит C га қарши дори воситаларининг 2024 йил ҳисобидан бешинчи партияси олиб келинди. Бу ҳақда “Дунё” АА хабар қилди.
Ўзбекистоннинг Қоҳирадаги элчихонаси хабарига кўра, Миср ҳукумати томонидан 2025 йилга қадар умумий қиймати 4,2 миллион доллар бўлган жами 800 минг дона С гепатитига қарши “Даклатасвир” ва “Софосбувир”, Б гепатитига қарши “Энтекавир” дори воситаларининг беғараз ёрдам сифатида берилиши бўйича келишувга эришилган.
2023 йил давомида умумий қиймати 696 минг долларга тенг бўлган мазкур дори воситалари Ўзбекистонга босқичма-босқич юборилди.
17 февраль куни Миср ҳукумати томонидан инсонпарварлик ёрдами сифатида ажратилган C гепатитига қарши “Софосбувир-400” дори воситаларининг 2024 йилдаги тўртинчи партияси етказиб берилди. Умумий 12 дона қутиларда 6720 дона ушбу дори воситалари Вирусология илмий-текшириш институти томонидан беморларга тақсимланади.
Мутахассислар ҳисоб-китобига кўра, бир нафар беморнинг 3 ойлик тўлиқ даволаш курси учун 3 қадоқ “Даклатасвир” ва 3 қадоқ “Софосбувир” керак бўлади. Мазкур даволаш курсининг Мисрдаги ўртача нархи 31 доллар бўлса, Ўзбекистонда жорий йилга қадар 100 долларга баҳоланиб келинган.
Миср ҳукумати тақдим этадиган 800 минг дона дори воситаси жами 133 минг беморга етади. Яъни, агарда гепатит C га қарши дори воситалари шу пайтгача хориждан харид қилинаётган баҳоларда сотиб олинганда Ўзбекистон давлат бюджетидан 13,3 миллион доллар сарфланган бўларди. Давлат бюджетидан иқтисод қилинган маблағлар гепатитни аниқлаш бўйича аҳолини скрининг қилиш ҳажмини жорий 10 мингдан 1 миллионга қадар ошириш, вирусларни аниқлаб, касалликка тўлиқ барҳам беришга имкон яратиши кутилмоқда.
Изоҳ (0)