Ўзбекистонда 2024 йилнинг ҳозирига қадар 9507 нафар бола гепатит А касаллигини юқтириб олди. Бу ҳақда Санитария-эпидемиологик осойишталик ва жамоат саломатлиги қўмитаси хабар берди.
Қайд этилишича, касалланиш кўрсаткичларининг ўсиши Андижон, Бухоро, Наманган, Сурхондарё, Самарқанд, Фарғона вилоятлари ҳамда Қорақалпоғистон Республикасида кузатилмоқда.
Гепатит А касаллигига қарши эмлаш 94-98 фоиз ҳолатларда вирус юқишининг олдини олади ва эмлашдан кейин кузатилиши мумкин бўлган жиддий асоратлар кузатилмайди.
Жаҳон соғлиқни сақлаш ташкилотининиг тавсиясига кўра, ушбу вакцинанинг хавфсизлиги ва сифатини кафолатловчи сертификатлари мавжуд бўлиб, вакцинация бир маротаба қўлланади, қайта эмлаш ишлари талаб этилмайди. Вирусли гепатит А касаллигига қарши асосан, 18 ойликдан 14 ёшгача бўлган болалар эмланади. Вирусли гепатит А вакцинаси билан эмланганидан сўнг 15 йилгача муддатда иммунитет таранглиги сақланиб қолади.
Ўтган йилнинг 12 ойи давомида республика бўйича жами 365 167 нафар болалар вирусли гепатит А касаллигига қарши вакцина билан эмланган. Шунингдек, ногирон, кам таъминланган ва ижтимоий ҳимояга муҳтож оилаларнинг 14 ёшгача бўлган болаларини ушбу касалликка қарши эмлаш мақсадида Қашқадарё вилояти, Тошкент вилоятининг Ўрта Чирчиқ тумани ва Тошкент шаҳри ҳокимликлари ташаббуси билан вирусли Гепатит А вакцинасини харид қилиш учун маҳаллий бюджетдан жами 4 миллиард сўмдан кўпроқ миқдорда маблағлар ажратилиб, 24 765 нафар болалар касалликка қарши эмланган.
Маълумот учун, Миср ҳукумати томонидан 2025 йилга қадар умумий қиймати 4,2 миллион доллар бўлган жами 800 минг дона C гепатитига қарши “Даклатасвир” ва “Софосбувир”, Б гепатитига қарши “Энтекавир” дори воситаларининг берилиши бўйича келишувга эришилган. Бугунга қадар умумий қиймати 696 минг АҚШ долларига тенг бўлган мазкур дори воситалари Ўзбекистонга босқичма-босқич юборилган.
Изоҳ (0)