Иммунитетнинг асосий вазифаси организмдаги ички ўзгаришларни аниқлаш ва уларни бартараф этишдир. Нормал иммунитет соат каби ишлайди ва патогенлардан ҳимоя вазифасини бажаради. Агар иммунитет заифлашса, унинг вирус ва бактерияларга қарши ҳимоя қилиш функцияси камаяди ва саломатлик билан боғлиқ муаммолар ривожлана бошлайди. Қуйида қандай белгилар иммунитет суст ишлаётганидан дарак бериши ва унга қандай ёрдам бериш кераклиги ҳақида суҳбат қурамиз.
Заиф иммунитет белгилари
Иммун тизими яхши ишламаётганининг энг биринчи белгиси бу тез чарчаш ва доимий ҳолсизликдир. Агар 8 соат уйқудан кейин ҳам чарчоқни ҳис қилсангиз, бу жиддий сигнал. Эҳтимол, сизнинг иммун тизимингиз ўз вазифасини яхши бажара олмаяпти ва тикланиб олиш учун танадаги бор энергияни ўзига тортиб оляпти.
Заиф иммунитетнинг иккинчи белгиси тана ҳароратининг бир оз кўтарилишидир. Агар бир неча кун давомида сабабсиз 37° C ёки ундан юқори ҳароратда юрсангиз, бундай ҳолат танада аутоиммун касалликлар ривожлана бошлаганидан дарак бериши мумкин. Бунда имкон қадар тезроқ шифокор билан маслаҳатлашиш лозим.
Танада қичишиш, тошмалар ва турли яллиғланишлар пайдо бўлиши ҳам иммунитет сусайгандан бўлиши мумкин, чунки организмда бўлаётган жараёнларнинг барчаси ташқи кўринишимизда акс этади.
Саломатлик заифлашганининг яна бир белгиси — доимий бош оғриғи. Албатта, бош оғриғининг турфа сабаблари бор, аммо иммун тизими яхши ишламаганда миядаги қон томирларига аутоиммун ҳужайралар ҳужум қилади ва бошга таъсир қилиб, оғриқ юзага келади.
Бир неча ҳафта давом этадиган қабзият ёки диарея ҳам пасайган иммунитет белгиларидан биридир. Бирор таом ёқмаган бўлса, ошқозондаги муаммолар бир неча кундан йўқ бўлади. Иммунитет пасайганда эса диарея ва қабзият ойлаб давом этади.
Қўлларнинг увушиб қолиши ва танада қон яхши айланмаслиги ҳам суст иммунитет белгисидир. Узоқ вақт ноқулай ҳолатда қолгандан қўлларнинг увушиб қолиши бундан мустасно. Заиф иммунитетда увушиш ҳолатлари тез-тез такрорланиб туради.
Кўзлар ёки юз терисининг сарғайиши шифокор кўригидан ўтишни талаб қиладиган жиддий аломатдир. Сариқлик жигар касалликларининг ривожланиши ҳамда иммунитетдаги бузилишлар аломатидир. Масалан, аутоиммун гепатит касаллигида иммун тизими жигардаги соғлом ҳужайраларга ҳужум қилади.
Иммун тизимининг сусайиши кўзларнинг қизариши, қичиши билан ҳам намоён бўлиши мумкин. Шунингдек, тез-тез шамоллаш, бир йилда икки ва ундан кўп марта антибиотик курси билан даволаниш иммунитет заифлашганидан далолат беради.
Иммунитет заифлашганда қандай чора кўриш керак?
Иммунитетни тиклаш учун шифокорга мурожаат этиш ва мутахассис томонидан тузилган батафсил даволаш режасига амал қилиш лозим. Бошқа касалликлар аниқланганда умумий даволаш шифокори — терапевт сизни тор мутахассисларга юборади. Шифокорларнинг умумий тавсияларини қўллаш, зарарли овқатлар ва спиртли ичимликларни истеъмол қилмаслик, спорт билан шуғулланиш ҳам иммунитетни тиклашга ёрдам беради.
Изоҳ (0)