Россия ўз орбитал станциясини яратиш ва 2025 йилдан Халқаро космик станция (ХКС) лойиҳасидан чиқиб кетиш ниятида. Бу ҳақда Россия бош вазирининг ўринбосари Юрий Борисов «Москва. Кремль. Путин» дастурида маълум қилди, деб ёзади Meduza.
Бош вазир ёрдамчисининг сўзларига кўра, Россия расмийлари бу ҳақда ХКСдаги шерикларини «очиқ-ойдин огоҳлантиради».
«Роскосмос» матбуот хизматининг хабар қилишича, станция тақдири тўғрисида ҳали сўнгги қарор қабул қилинмаган.
«ХКСда 2024 йилгача фаолият олиб бориш тўғрисида ҳамкорларимиз билан келишувимиз бор. Ушбу муддат тугагандан сўнг, қарор қабул қилиш муддати, асосан, ўз иш фаолиятини тугатган станция модулларининг техник ҳолати, шунингдек, янги авлод орбиталь хизмат кўрсатиш станциясини жойлаштириш бўйича режаларимиз асосида амалга оширилади » —дейилади «Роскосмос» хабарида.
Халқаро космик станцияси фаолиятининг муддати 2024 йилда тугайди. Аввалроқ ХКС Россия сегментидаги парвозлар раҳбари Владимир Соловьев станциянинг ишлаш муддати 2030 йилгача узайтирилиши мумкинлигини айтган эди, аммо у 2025 йилдан кейин ХКСда «кўплаб элементларнинг қор кўчкиси сингари жойидан кўча бошлаши» мумкинлигини тан олган.
Шунингдек, «Энергия» Ракета-космик корпорацияси маркази бошлиғининг ўринбосари Юрий Гидзенко ХКС фаолиятини 2028 йилга қадар узайтириш тўғрисида қарор қабул қилингани айтганди. Гидзенко ХКСдаги ямалган ёриқлар 2028 йилга қадар станциянинг фаолият муддатини қисқартиришга ҳеч қанақасига таъсир қилмаслигини айтган.Февраль ойи охирида Парвозни бошқариш маркази ХКСнинг Россия корпусида ҳаво сизиб чиқадиган олтита ёриқ бор бўлиши мумкинлиги ҳақида хабар берган. 2020 йил октябрь ойида ХКС экипажи Россиянинг «Звезда» корпуси оралиқ камерасида 4,4—4,5 см узунликдаги ёриқни аниқлаган.
«РБК» нашрининг хабар беришича, Халқаро космик станция (ХКС) экипажи станциядаги биринчи ёриқни герметик пломба билан ёпган.
Изоҳ (0)