Путиннинг даромади бир йил ичида миллион рублга ўсиб, 9,7 миллионни ташкил қилди

Кремль сайтидаги декларацияда қайд этилишича, Россия президенти Владимир Путиннинг 2019 йилдаги даромади 9,7 миллион рублни ташкил қилган.

2018 йилда Путин 8,6 миллион рубль ишлаб топганди ва унинг даромади бир йил ичида қарийб миллион рублга ўсди.

Путиннинг кўчмас мулклари рўйхати бир йил ичида ўзгармаган. Россия президенти майдони 77 квадрат метр бўлган квартира, 18 квадрат метрли гараж, иккита «Волга» (ГАЗ М21) автомобили, «Нива» йўлтанламаси ва «Скиф» тиркамасига эгалик қилади.

Ҳукумат аъзоларининг ҳам 2019 йилдаги даромадлари ҳақида ҳисобот берилган. Вазирлар маҳкамасининг энг бой амалдори саноат ва савдо вазири Денис Мантуров бўлиб турибди. У ўтган йили 586 миллион рубль даромадни декларациядан ўтказган (2018 йилда унинг даромади декларация бўйича 433 миллион рублни ташкил қилган).

Ҳукуматда энг кўп даромад қилганлар рўйхатида иккинчи ўринда бош вазир ўринбосари Дмитрий Чернишенко қайд этилган. У 432 миллион рубль даромад қилгани ҳақида декларация тўлдирган. Чернишенко 2020 йилгача ҳукуматда фаолият олиб бормаган ва «Газпром-медиа холдинги», «Миллий реклама альянси» ва «Континентал хоккей лигаси»да раҳбарлик лавозимларида ишлаган, дейилади «Интерфакс» хабарида.

Бош вазир Михаил Мишустин эса 2019 йилда 18,2 миллион рубль ишлаб топган. Мишустин ушбу маблағга Федерал солиқ хизматида ишлаган вақтида эгалик қилган, у 2020 йил январь ойида ҳукумат раҳбарига айланганди. Мишустиннинг рафиқаси 2019 йилда 54,8 миллион рубль даромад қилган. «Интерфакс» агентлигининг аниқлашича, ушбу даромадга банклардаги депозит жамғармаларидаги маблағлар ҳам қўшилган.

Бир йил аввал Россия ҳукумати аъзолари орасида энг кўп даромад кўрган амалдор бош вазир ўринбосари Юрий Трутнев бўлган, унинг маблағи 538 миллион рублни ташкил қилганди. 2019 йилда Трутнев декларациясида унинг даромади 180 миллион рубль.