Россия президенти Владимир Путин ҳукумат аъзолари билан ўтказилган йиғилишда Европа ва АҚШга табиий газни рублда сотиш тўғрисидаги қарорини эълон қилди.
«Товарларимизни Европа Иттифоқи, АҚШга етказиб бериб, тўлов учун доллар, евро ва бошқа валюталарни олишдан маъни йўқлиги очиқ-ойдин. Шунинг учун энг қисқа вақт ичида тўловларни ўтказиш бўйича чора-тадбирлар комплексини амалга ошириш қарорини қабул қилдим, дастлаб дўст бўлмаган деб аталувчи давлатларга табиий газимизни Россия рублида етказиб беришдан бошлаймиз. Яъни бундай ҳисоб-китобларда ўзини обрўсизлантирган барча валюталардан фойдаланишни рад этамиз», — дейди Путин.
Унинг таъкидлашича, Россия табиий газни аввал тузилган шартномаларда белгиланган ҳажм ва нарх тамойилларига мувофиқ етказиб беришда давом этади.
«Айрим шерикларимиздан фарқли ўлароқ, биз ишончли ҳамкор ва етказиб берувчи сифатидаги обрўйимизни қадрлаймиз. Ўзгаришлар фақат валюта тўловларига тааллуқли бўлиб, у Россия рублига ўзгартирилди», — дейди Россия президенти.
«Роскосмос» бош директори Дмитрий Рогозин ҳам шу каби баёнотни берган. «Эндиликда биз ҳам барча ташқи шартномаларимизни рублда тузамиз», — дейди у.
Аввалроқ Путин ғарб давлатларининг санкцияларига қарши жавоб чораларини кўриш бўйича фармон имзолаган эди. Ҳужжат билан хорижий валютани ўз хорижий ҳисоб рақамларига киритиш, хорижий тўлов хизматларини кўрсатувчи провайдерларга «электрон тўлов воситаларидан фойдаланган ҳолда» пул ўтказиш ва кредит шартномалари бўйича норезидентларга чет эл валютасини ўтказиш тақиқланди. Шунингдек, Россия 16 март куни 117 миллион долларлик фоиз тўловларини инвесторларга жўнатишни буюрган ва бир асрдан кўпроқ вақт ичида биринчи халқаро дефолтнинг олдини олишга уринмоқда.
Изоҳ (0)