Замонавий тарихда илк бор Япония ҳарбий кемаси Хитой ва Тайван оралиғидаги бўғоздан ўтди. Бу ҳолат Пекинда кескин салбий муносабатга сабаб бўлиб, Хитой ҳукумати Токиога норозилик нотаси юборди. Бу ҳақда NHK хабар берди.
Япон газетасининг маълумотларига кўра, “Сазанами” 25 сентябрь куни эрталаб Шарқий Хитой денгизидан Тайван бўғозига кириб, Пекинга сигнал юбориш мақсадида ҳаракат қилган. Кема ўтишни якунлаш учун жанубга йўл олар экан, бўғозда ўн соатдан ортиқ вақт ўтказган.
Бу Австралия ва Янги Зеландия ҳарбий-денгиз кучлари кемалари билан ҳамкорликда амалга оширилган. Япония ҳукуматидаги манбаларга кўра, ушбу уч давлат Жанубий Хитой денгизида қўшма ҳарбий машқлар ўтказишни режалаштирмоқда.
Япония бош вазири котибиятининг раҳбари Ёсимаса Хаяси эсминеснинг ушбу ўтиши ҳақида изоҳ беришдан бош тортган. Бироқ Хитойнинг минтақадаги ҳарбий фаоллиги кучайишидан ташвишланаётганини билдирган.
Биз қисқа вақт ичида ҳаво ҳудудининг кўп марта бузилишидан жиддий хавотирдамиз. Вазиятни диққат билан кузатишда давом этамиз, деган у.
Хитой Ташқи ишлар вазирлиги расмий вакили Лин Сзян япон эсминесининг ўтишини кескин қоралаб, бунинг “ягона Хитой” масаласидаги ўзаро келишувга зид эканини айтган.
“Хитой томони Япониянинг сиёсий ниятларини ташвиш билан кузатмоқда ва жиддий эътироз билдирди. Биз Японияни Тайван масаласи бўйича ўз мажбуриятларига риоя қилишга, сўз ва ҳаракатларида эҳтиёткор бўлишга, Хитой ва Япония ўртасидаги тинч муносабатларга ҳамда Тайван бўғозидаги барқарорликка халал бермасликка чақирамиз”, деди у.
NHK хабар беришича, Япония кучлари илгари Тайван бўғозини ўз юрисдикцияси, Тайванни эса ўз ҳудуди деб ҳисоблайдиган Пекинга қарши чиқмаслик мақсадида Тайван бўғозидан ўтишдан ўзини тийиб келган.
- Ўнлаб йиллар давомида фақат Қўшма Штатлар Тайван бўғози орқали ўз ҳарбий кемаларини мунтазам равишда ўтказиш ҳуқуқига эга бўлган ягона давлат бўлиб келди. Бироқ, икки ҳафта олдин бу ерда Германия ҳарбий кемалари пайдо бўлди. Бу ҳодиса 22 йил ичида биринчи марта содир бўлди.
Изоҳ (0)