Америка разведкаси маълумотларига кўра, Хитой Халқ озодлик армияси ўзининг “жосус” шарлари ёрдамида Хитой учун стратегик аҳамиятга эга мамлакатлар, жумладан Япония, Ҳиндистон, Вьетнам, Тайван ва Филиппиндаги ҳарбий объектлар ҳақида маълумот тўплаган. Бу ҳақда The Washington Post АҚШнинг бир қанча расмийларига таяниб, хабар берди.
Ушбу ҳаво шарларидан бири Хитойнинг жанубий қирғоқлари яқинидаги Хайнан провинцияси яқинида бир неча йиллардан бери учиб юрибди, деб ёзади газета. Манбаларга кўра, ХХР ҳаво кучлари томонидан қўлланган Хитой разведка шарлари беш қитъада аниқланган.
“Хитойликлар жуда эски технологияни олиб, бошқа мамлакатлар ҳарбийлари ҳақида разведка маълумотларини тўплаш учун уни замонавий алоқа ва кузатув воситалари билан бирлаштирган”, — деди расмийлардан бири.
6 февраль, душанба куни АҚШ Давлат котиби ўринбосари Венди Шерман 40 га яқин давлат элчихоналаридан 150 га яқин кишига Хитойнинг “жосус” шарлари ҳақида маълумот берди, деди АҚШ президенти маъмуриятининг юқори лавозимли мулозими. Давлат департаменти, шунингдек, АҚШнинг ҳар бир элчихонасига иттифоқчилар ва шериклар билан бўлишиш учун “батафсил маълумот” юборган. АҚШ Пекин томонидан ҳарбий объектлари нишонга олинган Япония сингари давлатлар расмийлари билан тафсилотларни алоҳида ўртоқлашди.
Эслатиб ўтамиз, январь ойи охирида Хитой шари АҚШ ҳаво ҳудудига киргани аниқланди. Хитой томони таъкидлашича, қурилма шамол туфайли йўналишидан оғиб кетган метеорологик зонд эди. Бироқ Вашингтон шарни жосус деб ҳисобламоқда. Қурилма Жо Байденнинг буйруғи билан 4 февраль куни ҳаво-ҳаво ракетаси ёрдамида уриб туширилди. Пекин бу борада Вашингтонга норозилик билдирди. Бу воқеа ортидан Давлат котиби Энтони Блинкеннинг Хитойга ташрифи бекор қилинди.
Изоҳ (0)