Япониядаги «Фукусима-1» атом электр станцияси (АЭС)даги радиоактив моддалардан тозаланган сув икки йилдан сўнг Тинч океанига қуйилишни бошлайди. Бу ҳақда Kyodo агентлигига таяниб, «РБК» хабар берди.
Хабарга кўра, ушбу қарор Япония департаментлари раҳбарларининг мамлакат бош вазири Ёсихидэ Суга билан ўтказган учрашувида қабул қилинди. «Сувни чиқариб ташламаслик атом электр станциясини ишдан чиқаришга олиб келадиган муқаррар муаммо ҳисобланади», — деди Суга. Агентликнинг таъкидлашича, «Фукусима-1»да тозаланган сув миқдори доимий равишда ортиб бормоқда. Reuters маълумотларига кўра, айни пайтда унинг ҳажми 1,25 миллион тоннани ташкил этади.
Агентлик хабарига кўра, маҳаллий балиқчилар станциядаги сувнинг океанга ташланишига қарши. Бош вазирнинг таъкидлашича, ҳукумат жараённинг хавфсизлигини назорат қилади. «Ҳукумат хавфсизликни таъминлашда етакчилик қилади ва миш-мишларни бартараф этиш учун барча чораларни кўради», — деди Суга. Шунингдек, денгиз маҳсулотларида радиоактив моддалар бор-йўқлиги назорат қилинади.
Reuters хабарига кўра, АЭСга эгалик қилувчи Тоkiо Electric Power Company Holdings Inc. (ТEPCО) энергетика компаниясига сувни утилизация қилишга тайёргарлик кўриш учун икки йил муҳлат берилган.
АЭСда сув ядро реакторларини совитиш учун ишлатилади. Уни радиоактив элементлардан бутунлай тозалаб бўлмайди. Шунинг учун, сув қўшимча равишда тоза суюқлик билан аралаштирилади ва шундан кейингина океанга ташланади.
Ҳозирда тозаланган сув «Фукусима-1» ҳудудидаги сув омборларида сақланмоқда. ТEPCO’нинг тахминларига кўра, 2022 йилнинг ёзига қадар омборлар сувга лиқ тўлади.
Япония расмийларининг қарори бир қатор давлатларнинг салбий реакциясига сабаб бўлди. Хитой Ташқи ишлар вазирлиги Япониянинг сувни Тинч океанига тўкиш тўғрисидаги қарорини масъулиятсизларча ўйланган ва қўшни мамлакатларга зарар етказиши мумкин, дея танқид қилди.
«Япониянинг яқин қўшниси ва манфаатдор томон сифатида Хитой бу борада жиддий ташвиш билдирмоқда», — дейилади вазирлик хабарида.
Хитойнинг фикрига кўра, АЭСдан чиққан сув денгиз муҳити ва қўшни мамлакатлар аҳолисининг соғлиғига ёмон таъсир кўрсатиши мумкин, чунки унинг таркибида ҳанузгача радиоактив элементлар мавжуд.
«Япония сувдан хавфсиз фойдаланиш усулларини қўлламаган шунингдек, қўшни мамлакатлар ва халқаро ҳамжамият билан кенгашмасдан, сувни дренаж орқали чиқариб ташлаш ҳақида бир томонлама қарор қилган», — дейилади вазирлик баёнотида.
Хитой Японияни ўз қарорини қайта кўриб чиқишга чақирди.
Ўз навбатида, Жанубий Кореянинг давлат сиёсатини мувофиқлаштириш идораси раҳбари Ку Юн Чхолнинг таъкидлашича, Сеул Япония ҳукуматининг Фукусима АЭСдаги ифлосланган сувни океанга тўкиш тўғрисидаги қароридан чуқур афсусда. Унинг сўзларига кўра, ҳукумат Жанубий Корея халқининг АЭСдан тўкилган сувдан ҳимоя хавфсизлигини таъминлаш учун барча зарур чораларни кўради.
АҚШ эса Япониянинг АЭСдаги сувни йўқ қилиш масаласига масъулият билан ёндашганига ва Токио ҳукуматининг мазкур масалада келгуси ҳаракатларини ҳам мувофиқлаштиришига умид қилмоқда.
«Япония ҳукумати ҳозирда «Фукусима-1» иншоотида сақланадиган тозаланган сувни йўқ қилиш билан боғлиқ бир неча вариантларни ўрганиб чиққанидан АҚШнинг хабари бор. Ушбу камдан-кам учрайдиган ва қийин вазиятда Япония вариантлар ва натижаларни тарозига тортиб кўрди, қарорда шаффофлик кўрсатди ва якунида дунёда тан олинган ядро хавфсизлиги стандартларига мос келадиган чораларни танлаган кўринади», — деди АҚШ Давлат департаменти вакили Нед Прайс.
У Токио ўз ҳаракатларини Халқаро Атом Энергияси Агентлиги билан мувофиқлаштираётганини таъкидлади ва АҚШ «ушбу чора-тадбирларнинг самарадорлигини кузатиб борар экан, Япония ҳукумати билан ҳамкорлик ва мулоқотни давом эттиришни»га умид қилаётганини қўшимча қилди.
Изоҳ (0)