Hindiston Manipur shtatining ayrim hududlarida komendantlik soati e’lon qilib, internetni o‘chirib qo‘ydi. Bu haqda BBC xabar berdi.
Bunga etnik guruh yetakchilarining hibsga olinishi oqibatida norozilik namoyishlari boshlangani sabab bo‘lgan.
8-iyun kuni politsiya Meitei qurolli radikal guruhi “Arambai Tenggol”ning 5 nafar yetakchisini, jumladan, ularning rahbari Asem Kanan Singxni hibsga olgan. Hindiston tergov agentligi Singh Imfal aeroportida 2023-yilda shtatda sodir bo‘lgan zo‘ravonlik bilan bog‘liq “turli jinoiy harakatlar”ga aloqadorligi uchun hibsga olinganini bildirgan.
Manipurda 2023-yildan beri 2 yirik guruh, Meitei va Kuki o‘rtasida yer va qudrat uchun etnik to‘qnashuvlar sodir bo‘lib kelmoqda. Ushbu mojaroda 250 dan ortiq odam halok bo‘lib, o‘n minglab odamlar ko‘chirilgan.
“Arambai Tenggol” Meitei guruhi tomonidan qo‘llab-quvvatlangani bois davlatda katta ta’sirga ega. So‘nggi keskinliklar tergov agentligi Singx va “Arambai Tenggol”ning yana 4 nafar rahbarini hibsga olgach boshlangan va ular qo‘shni Assam shtatidagi Guvaxati shahriga olib ketilgan.
Shundan so‘ng, “Arambai Tenggol” a’zolarini ozod qilishni talab qilgan namoyishchilar politsiya postiga bostirib kirgan. Avtobusga o‘t qo‘yib, Imfalning ba’zi hududlarida yo‘llarni to‘sib qo‘ygan. Namoyishchilarning bir qismi xavfsizlik xodimlari bilan ham to‘qnashgani ta’kidlangan. Xavfsizlik kuchlari olomonni tarqatish uchun ko‘zdan yosh oqizuvchi gaz snaryadlari va o‘qlardan foydalangan. Oqibatda 13 yoshli bola jarohat olgan.
Bu voqealardan keyin hukumat shtatning 5 ta tumanida internetni 5 kunga to‘xtatib qo‘ygan. 1 ta shtatda esa nomaʼlum muddatga komendantlik soati joriy etilgan. Shuningdek, ba’zi joylarda 4 va undan ortiq kishining to‘planishi taqiqlangan.
Izoh (0)