Малида ҳарбий маъмуриятнинг буйруғига биноан қуруқлик ва ҳаво чегаралари ёпилиб, комендантлик соати ўрнатилди. Бу ҳақда Seneweb янгиликлар порталига таяниб, «ТАСС» хабар берди.
Хабарга кўра, комендантлик соати бутун мамлакат бўйлаб соат 20:00 дан 06:00 гача амал қилади. Ушбу чоралар Малида 24 май куни ҳарбийлар мамлакатнинг муваққат президенти Ба Ндао ва бош вазир Моктар Уанни ҳибсга олиб, уларни мамлакат пойтахти Бамако яқинидаги ҳарбий базага жойлаштиргандан сўнг бошланган сиёсий инқироз билан боғлиқ ҳолда қабул қилинди. Ҳибсга олишдан бир кун ўтиб, вице-президент Ассими Гойта президент ва бош вазир барча ваколатлардан маҳрум қилингани айтди. 26 май куни улар истеъфо берди. Истеъфо бўйича Ндао ва Уандан ҳали расмий баёнот олинмаган.
Seneweb маълум қилишича, 26 май куни Бамакода Гойта бошчилигидаги ҳарбий гуруҳ ва Малига ташриф буюрган Ғарбий Африка давлатлари Иқтисодий Ҳамжамият (ECOWAS) воситачилари делегацияси ўртасида маслаҳатлашувлар бўлиб ўтди. ECOWAS Мали ҳарбийларига Ндао ва Уанни озод қилиш учун тезкор чоралар кўрилмаса, кенг кўламли санкциялар билан таҳдид қилди
Ўз навбатида Гойта яқин икки кун ичида янги ҳукумат тайинлаш ниятида эканини айтди. Шу билан бирга, янги муваққат президент сайлангунга қадар Малидаги олий ҳокимият ҳарбий кенгаш қўлида бўлади. Маслаҳатлашувлар давом этмоқда ва томонлар ҳали ўз позицияларини ўзгартириши мумкин.
AFP агентлигининг Мали ҳарбийларига таяниб хабар беришича, президент ва бош вазир истеъфога чиққанидан сўнг озод этилди. «Бош вазир ва муваққат президент 27 май туни соат 1:30 (Тошкент вақти билан 00:30)да озод қилинди. Биз сўзимизнинг устидан чиқдик», — дея ҳарбий ҳокимият вакилининг баёнотини келтирди АFP.
Маълумот учун Малидаги ECOWAS делегациясига Нигериянинг собиқ президенти Гудлак Жонатан раҳбарлик қилмоқда. У 2020 йил август ойидаги ҳарбий тўнтаришдан сўнг Малига уч марта ташриф буюрган ECOWAS воситачилар делегациясини бошқариб, Гойта ва Мали ҳарбийлари билан музокараларда қатнашган эди. Ўшанда ECOWAS томонидан кенг қамровли санкциялар таҳдиди остида ҳарбийлар фуқаролик бошчилигидаги ҳукумат тузишга, шунингдек, Малининг муваққат президентини сайлашга келишиб олган.
21 сентябрда ҳарбийлар томонидан ташкил қилинган сайловлар коллегияси собиқ мудофаа вазири ва истеъфодаги полковник Ба Ндаони Малининг кейинги 18 ой давомидаги муваққат президенти, Ассими Гойтани эса вице-президент этиб тайинлаган эди. Ба Ндао ўзининг фармони билан ташқи ишлар вазирлигининг собиқ раҳбари Моктар Уанни 27 сентябрь куни Мали муваққат ҳукумати раҳбари лавозимига тайинлаган.
Ҳарбийлар Малида ўтиш даври давом этишини ва ҳокимиятни қўлга киритган кунидан 18 ой ўтгач бўлиб ўтадиган президент ва парламент сайловлари орқали мамлакат демократик бошқарувга қайтишини эълон қилган.
Изоҳ (0)